Саха сиригэр кэнники сууккаҕа саҥа ойуур баһаара көстүбэтэ. Өрөспүүбүлүкэ үрдүнэн Орто Халымаҕа алта баһаар баар уонна биир — Уус-Майа оройуонугар.
«Күнүскү температура намтаатаҕын ахсын, ойуур уота сыыйа аччыыр. Атырдьах ыйын 25 күнүгэр сарсыарда өрөспүүбүлүкэ сиригэр-уотугар баһаартан куттал кылааһа үстэн үрдүгэ суох, арай Уус- Майа оройуонугар муниципальнай характердаах ЧС салгыы үлэлиир. Итини сэргэ, Орто Халыма оройуонун 1 нэһилиэгэр ЧС киирдэ»,-диэн өрөспүүбүлүкэ экологиятын, айылҕатын уонна тыатын хаһаайыстыбатын миниистирин солбуйааччы Андрей Коноплев иһитиннэрдэ.
Билигин 74,667 гектар иэннээх сиргэ икки ойуур баһаарын умуруора сылдьаллар, 355 киһи уонна 11 тиэхникэ үлэҕэ тардылынна. Ааспыт сууккаҕа авиация эмиэ туһанылынна.
Өрөспүүбүлүкэ сиригэр-уотугар баһаартан сэрэхтээх буолуу сезона саҕаланыаҕыттан 573,168 гектар иэннээх сиргэ 527 ойуур баһаара бэлиэтэммит, былырыын баччаларга 7 мөл. гектартан ордук иэннээх сиргэ 1512 ойуур баһаара бэлиэтэммитэ.
