Дьокуускайга икки төгүллээх олимпийскай чемпион, аан дойду, Европа хас да төгүллээх кыайыылааҕа, греко-римскай тустууга Россия спордун үтүөлээх маастара Роман Власов кэллэ, суруйар СИА.
«Хас биирдии спортсмен иэһэ — үүнэр көлүөнэни өйөөһүн. Мин билэбин, Саха сирэ — тустуу территорията, саалалар куруук толорулар. Онон маастар-кылаастары күүтэбин, эдэр тустууктары кытта көрсөргө, уопуппуттан уонна билиибиттэн муҥутуурдук үллэстиэм. Олимпийскай мэтээллэрбин илдьэ кэллим, хас биирдии оҕо тутан көрөрүгэр анаан. Саха сирин оҕолоруттан ким эрэ олимпийскай чемпион буоларыгар эрэллээхпин», — диэтэ Роман Власов.
Власов «Модуҥҥа» спортивнай оскуолалар уһуйуллааччыларыгар маастар-кылаастары ыытыаҕа. Р. М. Дмитриев аатынан олимпийскай саппаас училищетыгар сылдьыаҕа уонна эдэр тустууктары кытта кэпсэтиэҕэ.
