Саха сиригэр Өлүөнэ муостатын тутуу үлэтэ кыһын да, сайын да былааннаахтык ыытыллар. Билигин сыбаайалары охсууга уонна бөҕөргөтүүлэри туруорууга сезоннааҕы үлэ ыытыллар. Бу туһунан кулун тутар 5 күнүгэр Саха сирин нэһилиэнньэтин иннигэр бырабыыталыстыба отчуотугар өрөспүүбүлүкэ бырабыыталыстыбатын бэрэстээтэлэ Кирилл Бычков туһааннаах боппуруоска эппиэттииригэр кэпсээтэ.
«Ким баҕарар Өлүөнэ муостата хайдах тутулла турарын көрүөн сөп. Быйыл сайын ууга түһэрии уонна өрүс төрдүгэр икки коффердам туруоруу былааннанар. <…> Чопчу хаһан? Барыта Өлүөнэ өрүс уутун таһымыттан тутулуктаах. Ол да буоллар былаан быһыытынан маннык үлэлэр көрүллэллэр», — диэтэ премьер-миниистир.
Кирилл Бычков Өлүөнэ муостата – Арассыыйаҕа ураты бырайыак буоларын санатта. Саха сирэ курдук тыйыс климаттаах усулуобуйаҕа вантовай муосталары аан дойдуга өссө ким да туа илик. Бырайыак тутуу уонна туһаныы ураты усулуобуйаларын учуоттаан оҥоһулунна: намыһах температура, тэтимнээх муус барыыта уонна күүстээх халаан.
Коффердамнар муоста үс пилонун тутууга өрүскэ кураанах зоналары тэрийэргэ наадалар. Конструкциялар муус барыытын тулуйарга уонна үлэ бириэмэтин аҕыйатарга уустук климат усулуобуйатын учуоттаан оҥоһуллубуттар. Кинилэри хомуйарга, тэринэргэ барыта 9695 туонна тимир конструкция наада.
Арассыыйа бэрэсидьиэнэ Владимир Путин өйөбүлүнэн уонна дойду бырабыыталыстыбатын быһаарыыларынан Өлүөнэ муостата быйыл «Инфраструктура для жизни» национальнай бырайыакка киллэриллэн, федеральнай үбүлээһини ылбыта.
This post was published on 06.03.2026 13:09 13:09