27 Тохсунньу 27.01
  • -48°
  • $ 73,82
  • 83,32

Ийэ туһунан саҥа кинигэ таҕыста

18:24, 07 декабря 2016
Текст:

Кэнники кэмҥэ дьон дойдуларын, дьоннорун туһунан кинигэ таһаарар буоллулар. Соторутааҕыта биир оннук кэрэхсэбиллээх кинигэ күн сирин көрдө. “Ийэбит баар буолан…” диэн иһирэх ааттаах. Ийэ туһунан кинигэ истиҥ иэйиилээх, сылаас тыыннаах, дириҥ ис хоһоонноох буолар. Санааҕа саспыт, сүрэххэ сөҥмүт таптал, сүгүрүйүү, барҕа махтал тыллара ийэҕэ эрэ ананаллар. 


Сунтаар улууһун Кутана нэһилиэгин олохтооҕо, тоҕус оҕону төрөтөн улаатыннарбыт, ССРС “Ийэ буолуу” I-II истиэпэннээх мэтээллэринэн, ССРС “ийэ Албан аата” I-II-III уордьаннарынан, “Сэрии сылларын оҕолоро” өйдөбүнньүк мэтээлинэн бэлиэтэммит, үлэ, тыыл бэтэрээнэ Марфа Ивановна Николаева туһунан бэртээхэй кинигэ бэчээттэннэ. Ытык кырдьаҕас 90 сааһын туолан, сүһүөҕүн үрдүгэр сылдьан, бу сайын күн сириттэн күрэммитэ.

Кинигэни оҕолоро, сиэннэрэ бэлэмнээн, үбүлээн таһаардылар. Ийэ дьоло – оҕолоругар диэн мээнэ этиллибэт. Марфа Ивановна оҕолоро бары – дьоһун дьон. Биир ыалтан үс суруйааччы үүнэн-иитиллэн тахсыбыта, бука, Саха сиригэр сэдэх буолуо. Медицинэ наукатын дуоктара Валериан Николаев, суруналыыстар Галина Нельбисова, Надежда Егорова-Намылы – Суруйааччылар сойуустарын чииэннэрэ.

oblozhka

Ийэлэрин тиһэх күнүгэр диэри көрбүт-харайбыт улахан убайдарыгар Валерий Парфеньевичка бииргэ төрөөбүттэрэ бары махтаналлар. Борис Парфеньевич – “Сунтаар сонуннара” хаһыат эрэдээктэрэ, Сунтаар улууһун Бочуоттаах олохтооҕо. Степан Парфеньевич “Госстрах” тэрилтэҕэ экономиһынан, начаалынньыгы солбуйааччынан үлэлээбитэ. Кыра кыргыттара Фатина оҕо саадыгар иитээччинэн, Раиса нолуок инспекциятыгар үлэлииллэр. Тоҕус оҕоттон элбэх сиэн, хос сиэн баар.

Кинигэ биир уратытынан, дьиэтээҕи альбом курдук, элбэх хаартыска киирбитэ буолар. Былыргыттан саҕалаан, улахан дьиэ кэргэн олоҕо ырылхайдык көстөн кэлэр. Ийэлэрин докумуоннарын сыа-сым курдук тутан альбомҥа киллэрбиттэрэ кэлэр көлүөнэҕэ ураты өйдөбүнньүк буолсу. Бу буоллаҕа, оҕо ийэҕэ махтала, ытык иэһин төлөбүрэ.

Валериан Парфеньевич дойдутун, дьонун туһунан уустаан-ураннаан хоһуйан, хоһоон гынан киллэртээн биэрбитэ кинигэни иһирэх тыынныыр.

Ытык кырдьаҕас олорбут дьоһун олоҕо оҕолоругар, сиэннэригэр салҕанар, үгүс дьоҥҥо холобур буолар. Кини олоҕун түһүмэхтэринэн саха мааны ыалын эйгэтэ, олоҕо-дьаһаҕа тыктарыллан көстөр. Кинигэ урууларыгар-аймахтарыгар эрэ буолбакка, нэһилиэк, улуус, ону тэҥэ өрөспүүбүлүкэ ааҕааччыларыгар кэрэхсэтэр кэриҥнээх.

0
0
Тутаах тыллар
27 января 27.01
  • -48°
  • $ 73,82
  • 83,32