II Дьөппөн нэһилиэгэр тупсаҕай, аныгылыы тутуулаах «Илин Эҥэр» туристическай база арылынна. Улуу эбэ уҥа кытылыгар сытар Самыртай сыһыытын хабыллар хаба ортотугар кэрэ көстүүлээх, баай историялаах сиргэ туризм сайдарыгар усулуобуйа тэриллэр.
Хаҥалас улууһа кэрэ-бэлиэ, ытык-мааны эриэккэс айылҕалааҕынан биллэр, дьон хараҕа хайгыы көрөр кэрэ көстүүлээх Күрүлүүр, Туруук Хайа, Булуус хайысхатыгар, Бүүтэҥэ үрэх үрдүгэр, аан аартыгар саҥалыы, аныгылыы тутуулаах, ураты көстүүлээх дьон сынньанар дьиэтэ тутулунна. «Илин Эҥэр” федеральнай суол кытыытыгар тайаан сытар буолан транспорт бары көрүҥэ тиийиэн сөп, кыһыннары-сайыннары үлэлиэҕэ, манна сынньалаҥҥа наадалаах тэрил барыта баар буолан дьон сэҥээритин ылла.
Бу туристическай базаны Күөрдэм олохтоохторо Ольга Афанасьевна, Андрей Дмитриевич Скрябиннар Уһук Илин гектарынан ылан арыйдылар. Саҥа тутуу дьон сэҥээриитин ылан, үөрэ-көтө ыалдьыттарын сынньалаҥнарын туһалаахтык, умнуллубаттык атааралларыгар ыҥырар. Хаһаайыттар туризм сайдыытыгар саҥа кэрдиискэ тахсарга былааннара-соруктара өссө да элбэх, сиһилии инстаграм @turbaza_ilin_ener киирэн билсиэххитин сөп.
