«Магдебург» уонна «Мальчиков» теплоход-рефрижератордар Аллайыаха, Абый, Булуҥ уонна Аллараа Халыма улуустарыттан 900 туоннаттан тахса балык тиэйэн аҕалыахтара. Уу ааллара Дьокуускайга алтынньы ортото тиксиэхтэрэ, СИА-ҕа тыа хаһаайыстыбатын министиэристибэтэ иһитиннэрдэ.
Тыа хаһаайыстыбатын министиэристибэтин хотугу салаа уонна балык комплексын отделын салайааччыта Иннокентий Баланов иһитиннэрбитинэн, сайыҥҥы балыктааһын түмүктэнэр. Балык хаһаайыстыбалара бүгүҥҥү күҥҥэ 1451 туонна балыгы бултаатылар, былырыын — 1095,1 туонна этэ.
«Хотугу уонна Арктика улуустарыттан 960 туонна балыгы таһаарар былаан баар. Билигин рефрижератордарга 833 туонна балык тиэйилиннэ. Айаннаан иһэн аараттан эмиэ хомуйан ааһыахтара. Быйыл Халыма бөлөхтөн атын улуустар былааннарын толордулар. Кыһыҥҥы балыктааһын саҕаланыа, балыксыттар туруоруллубут соруктарын толороллоругар эрэл баар», — диэтэ Иннокентий Баланов.
This post was published on 09.10.2020 16:01 16:01