Дьокуускайга «Саха сирин норуоттарын муусукатын уонна фольклорун түмэлигэр» «Хоту дойду ойууттара» диэн быыстапка буола турар. Бу туһунан СИА түмэл тутаах үлэһитэ Ия Меккюсярова иһитиннэрдэ.
«Былырыын чинчийээччи В.И.Иохельсон сэдэх хаартыскаларынан тэрийбит быыстапкабытын дьон-сэргэ улаханнык кэрэхсээбитэ, сэҥээрбитэ. Онтон быйыл «Хоту дойду ойууттара» диэн быыстапканы тэрийдибит. Онно Иохельсон хаартыскалара эмиэ киллэрилиннилэр. Быыстапкаҕа уопсайа дэҥҥэ көстөр 67 экспонат туруорулунна. Манна ойууттар таҥастара, эбээн, дьүкээгир уустарын харысхал эмэгэттэрэ, булт абыгар-хомуһунугар, о.д.а. араас сиэргэ-туомҥа туттуллубут, туһаныллыбыт маллар-саллар, дүҥүрдэр уонна В.Иохельсон ойуун кыыра турарын, мэтириэттэрин, дүҥүрдэрин түһэртээбит былыргы дьыллар быыстарын сэгэтэр ураты хаартыскалара о.д.а. бааллар. Быыстапкаҕа эбэҥки улахан ойууна Семен Васильев-Савей туһунан билэ-көрө кэлээччи элбэх. Маны сэргэ, көрөөччүлэр түмэл үлэтин-хамнаһын, быыстапкалар тустарынан сиһилии билэллэригэр мультимедийнай чаас элбэҕи сэһэргиир», — диэтэ музей үлэһитэ.
Музей фондата сылтан-сыл хаҥыырын, быыстапкаларга сылдьааччылар элбээн иһэллэрин бэлиэтээтэ.
