14 От ыйа 14.07
  • 25°
  • $ 87,74
  • 95,76

Хомуһу оҥорууга кырачаан көмөлөһөөччүлэрдээх уус бастаата

17:37, 25 июня 2018
Текст:
Читайте нас на
Яндекс Новости
ЯДВ

Туймаада ыһыаҕын кэмигэр икки күн устата тимир уустара тыылыы тэбэн туран батыйа, быһах уонна хомус оҥорууга күрэхтэстилэр. Тэрээһиҥҥэ өрөспүүбүлүкэ араас муннуктарыттан тиийэ кэлэн кытыннылар.

edersaas.ru

Уустар күрэхтэһиилэрэ урукку сылларга эмиэ ыытыллара эрээри, кэлин тохтуу сылдьан баран быйыл хаттаан сөргүтүлүннэ. Бу сырыыга батыйа күрэҕэр 7, быһахха 16, хомуска 3 уус кытынна.

Александр Терентьев-Айгын Уус иһитиннэрбитинэн, үс сыллааҕыта Саха Өрөспүүбүлүкэтин уустарын Сойууһа тэриллибит. Саҥаттан күүс ылыммыттыы уустар тимири уһаарыыттан саҕалаан, бастакы күн батыйаны, быһаҕы, иккис күн хомуһу оҥорууга бастыҥы быһаарыстылар.

Уустар күрэхтэһиилэрин тэрийээччилэр. Хаҥастан уҥа: Роман Готовцев-Мындыр Уус, Александр Терентьев-Айгын Уус.

Балаһыанньа быһыытынан хомуһу чочуйуу күрэхтэһиитигэр кыттааччылар бэйэлэрин билиһиннэриэхтээхтэр,  иккилии хомуһу оҥоруохтаахтар уонна дьүүллүүр сүбэ иннигэр хомустарын тыаһатан иһитиннэриэхтээхтэр. Хайаан даҕаны итинтэн биирэ намыһах, иккиһэ үрдүк тыастаах буолуохтаах. Төһө даҕаны аҕыйах киһи кыттыбытын иһин, бэрт тыҥааһыннаахтык ааста.

Василий Уаров уолун кытта.

Тус бэйэм, Сунтаартан кэлэн кытта сылдьар Василий Уаровы бэлиэтиэм этэ. Ол курдук, эмдэй-сэмдэй уолаттара, кыраларбыт диэбэттэр, туһа дьоно эбит. Аҕаларыгар үстүрүмүөнүн тутан, илии-атах буолан көмөлөстүлэр. Туйах хатарааччылары иитэлии сылдьарын биһирии көрдүм. Дьүүллүүр сүбэ балай даҕаны уһун сүбэлэһиитин кэнниттэн кыайыылааҕынан Василий Уаров ааттанна. Иккис миэстэни Феликс Комиссаров (Томпо), үсүһү Николай Аржаков-Боло Уус (Дьокуускай к.) ыллылар.

Иккис миэстэлээх Феликс Комиссаров

 

Үһүс миэстэлээх Николай Аржаков-Боло Уус.

Батыйаны оҥорууга күрэхтэһии:

1 м. Леонид Говоров (Нам)

2 м. Степан Пахомов (Таатта)

3 м. Иван Тимофеев (Ньурба).

Быһаҕы оҥорууга күрэхтэһии:

1 м. Роман Петров (Нам)

2 м. Феликс Комиссаров (Томпо)

3 м. Леонид Говоров (Нам)

Кыайыылаахтар Металлторг, Хозмаркет, “Якутия” ФАПК тэрилтэлэртэн уһанарга туһалаах, сыаналаах бириистэри туттулар.

Чехияттан кэлэ сылдьар ыалдьыттар Хомус мусуойун тэрийэр салаатын сэбиэдиссэйэ Эркин Алексеевы, тылбаасчыт Алдана Ласакованы кытта.

Түмүк тахсарын кэтэһэ таарыйа, ыалдьыттары кытта кэпсэттим. Быйыл Арассыыйа иһиттэн эрэ буолбакка, тас дойдулартан тиийэ кэлии дьон элбэҕэ сөхтөрдө. Чехияттан сылдьар Прагатааҕы Худуоһунньуктар академияларыгар  үөрэнэр Станяны уонна программист идэлээх Мартины кытта, Чехияҕа олорор тылбаасчыт Алдана Ласакова (Уус Алдантан) көмөтүнэн кэпсэттим:

Ыһыахха аан маҥнайгытын сылдьабыт. Биһиэхэ маннык тэрээһин суох. Саамай улааппыта – Саҥа дьыл. Ыһыахха, төһө даҕаны күн тахсыбатаҕын иһин, күнү көрсүү сиэрин-туомун, алгыһын сөбүлээтибит. Бэҕэһээ уустар батыйа, быһах оҥороллорун көрдүбүт. Уустар бэйэлэрэ тахсан маһы кэрдэн киллэрэллэрин илэ харахпытынан көрдүбүт. Саха быһаҕын атыыластым (аап. Мартин. Л.П.). Ону тэҥэ оһуокайы биһирээтибит. Тылбаасчыппытыттан үөрэммит билэр тылларбытыгар  хатыластыбыт. Билбэт тылларбытыгар көннөрү дорҕоон таһааран хамсанныбыт эрэ эрээри, олус астынныбыт. Түһүлгэҕэ хоннубут. Салгыы Өлүөнэ очуостарын, Булууһу көрөр былааннаахпыт, — дэһэллэр.

 

Людмила ПОПОВА, “Саха сирэ” хаһыат, edersaas.ru

Ааптар хаартыскаҕа түһэриилэрэ.

1

0
Следите за самым важным и интересным в Telegram-канале и WhatsApp-группе ЯСИА