М.К. Аммосов аатынан ХИФУ инженердэри бэлэмниир факультетын устудьуоннара үөрэх бастакы семестриттэн үрдүкү стипендияны ылыахтарын сөп. Бу туһунан «Сахамедиа» «Улуус олоҕо» бырайыагын чэрчитинэн ыытыллыбыт төгүрүк остуолга эттилэр.
Өрөспүүбүлүкэ үрдүк үөрэҕин кыһаларыгар үөрэххэ киириигэ докумуоннары тутар хампаанньа саҕаланыытыгар аналлаах төгүрүк остуол буолла. Федеральнай университет үрдүк үөрэх иннигэр үөрэхтээһин уонна идэни талыыга факультетын декана Светлана Федорова инженернай факультекка үөрэнэр устудьуоннар бастакы куурустан үрдүкү стипендияны ылыахтарын сөбүн иһитиннэрдэ.
«Үрдүкү стипендияны инженернай идэҕэ үөрэнэр устудьуоннар, биир кэлим эксээмэннэрин орто баала 65-тэн үрдүк буоллаҕына эрэ ылаллар. Кинилэргэ стипендиялара икки төгүл улахан буолар. Ол эбэтэр устудьуон бастакы семестртан саҕалаан, ый аайы аҕыс тыһыынчаттан тахса солкуобайы ылар кыахтанар«, — диэн быһаарда Светлана Федорова.
Маннык быһаарыы ХИФУ учуонай сэбиэтинэн ылыллыбыт.
This post was published on 15.06.2017 17:30 17:30