Бүгүн үтүөкэн күн үүннэ, өрөспүүбүлүкэбит 100 сылын томточчу туолла. Хатаска Самсоновтар ааттарынан оскуола көҕүлээһининэн бэҕэһээ күргүөм ырыа ньиргийдэ.
Хатас нэһилиэгэ Саха АССР 100 сыллаах үбүлүөйүн уруйдуу, дьоһун ситиһиилээх көрсөр. Оскуола кэлэктиибин эр дьонун ансаамбыла М.Жирков музыкатыгар «Сахам сирэ барахсан» диэн ырыаны «Тускул» КК кытта бииргэ клип таһааран, куйаар нөҥүө ыыттылар. Ырыа аранжировкатын Ө.Луҥха оҥордо.
Хатастааҕы «Ситим» айымньы дьиэтин кэлэктиибэ бу күннэргэ төлөннөөх М.Аммосов төрөөбүт төрүт дойдутугар — Хатырыкка — автопробег тэрийдэ. Өрөспүүбүлүкэ, Дьокуускай куорат, Хатас былаахтарын күөрэччи көтөҕөн, анал бырагырааманан, дьоһуннаах дьаһалы ыыттылар. Элбэҕи биллилэр, көрдүлэр, бэйэлэригэр саҥаны, сонуну арыйдылар.
Хатастар уонна хатырыктар кэлэр көлүөнэ ыччаты дойдуга бэриниилээх буолууга иитиигэ икки өттүттэн бииргэ үлэлэһиэх буоллулар.
Ааптар: Наталья Руфова, Хатас.
