Хатастааҕы сибиинньэ иитэр комплекска саҥа астыыр-үөллүүр сыах тутуллан үлэҕэ киирдэ. Аныгы технологиянан тутуллубут эбийиэк 78 м усталаах, 18 м туоралаах, ол эбэтэр 1404 кв. м иэннээх. Манна биир аанынан тыыннаах сибиинньэни киллэрэн баран, нөҥүө өттүнэн маҕаһыын долбууругар ууруллар гына бородууксуйа эгэлгэтин астаан, бэлэмнээн таһаарарга тиийэ силигэ барыта ситэриллибит.
“Урукку сыахпыт эргэрэн, сууллар туруктааҕа уонна үлэлииргэ-хамныырга олус кыараҕас этэ. Онно холооно суох тупсаҕай усулуобуйа тэрилиннэ”, — диэн үлэһиттэр үөрсэллэр. Саҥа сыахха барыта механизация көмөтүнэн оҥоһуллар, биир симиэнэҕэ 40 сибиинньэни өлөрөн астыыр кыамталаах. Ол аата сыл устатыгар 8,5 тыһ. сибиинньэттэн 810 туонна эти оҥорон таһаарыахха сөп. Итинтэн аҥаарын кэриҥэ, 420 туонната, полуфабрикаттары астыырга туттуллар.
Эбийиэги арыйыы сиэригэр-туомугар кыттыбыт бырабыыталыстыба бэрэссэдээтэлин бастакы солбуйааччы-тыа хаһаайыстыбатын уонна ас-үөл бэлиитикэтин миниистирэ Петр Алексеев бу эбийиэги тутуу 2017-2018 сылларга суоттаммытын, ол гынан баран, “Хатастааҕы сибиинньэ комплекса” ХЭУо бас-көс тэрилтэтэ — “Анаабыр алмаастара” хампаанньа утары үп уган суһалсытыллыбытын эттэ. Ол курдук, икки сыл тутуллуохтааҕын суббэдэрээччик “Стройгазсервис” ХЭУо 8 ыйынан үлэҕэ киллэрдэ. Саҥа эбийиэк симиэтэтэ 85 мөл. солк. тэҥнэһэр буоллаҕына, 54 мөл. солкуобайа өрөспүүбүлүкэ бүддьүөтүттэн үбүлэммит, быйылгы бүддьүөттэн өссө 27 мөл. солк. угуллуо. Онон тутуу ороскуотун 95 бырыһыанын судаарыстыба толуйар.
Петр Николаевич “Анаабыр алмаастара” ААУо министиэристибэлиин ыкса үлэлэһэр буолан, Хаҥалас улууһугар “Бөртө” сылгы собуотун, Нөмүгүтээҕи агрофирма уонна Өлүөхүмэ улууһугар “Өлүөхүмэ кыладабыайа” хаһаайыстыба материальнай-техническэй базаларын бөҕөргөтүүгэ кэлиҥҥи сылларга улахан кээмэйдээх үлэ ыытыллыбытын бэлиэтээтэ. Хампаанньа генеральнай дириэктэрэ Павел Маринычев: “Министиэристибэлиин кэлим былааҥҥа олоҕуран үлэлиибит. Биһиги сорукпут – дьоҥҥо үлэлиир усулуобуйаны тэрийэн, бэйэ оҥорон таһаарар чэгиэн аһын-үөлүн дэлэтиигэ көмөлөһүү”, — диэтэ.
Хатас нэһилиэгин дьаһалтата уонна олохтоохторо 1985 сыллаахха тутуллан киирбит комплекс ыарахан кэмнэри туораан, иккис тыынын үлэлии турарыттан, сылтан сыл сайдан, кыаҕыран иһэриттэн, ол ахсын комплекска үлэлиир нэһилиэк ыалларын дохуоттара үрдүүрүттэн астыналларын биллэрдилэр. Кырдьык, олох бары оскуолатын ааспыт уопуттаах салайааччы Роман Гаврильевич Дмитриев илиитигэр киириэҕиттэн комплекс үлэтэ-хамнаһа биллэрдик сэргэхсийдэ: сибиинньэ төрүөҕүн тыыннаахтыы ылыы икки төгүлтэн ордук улаатта, ол эбэтэр урукку сылларга 6 тыһыынчаттан өнүйбэт эбит буоллаҕына, билигин 13 тыһыынчаттан таҕыста. Инньэ гынан, исписэлиистэр бэлиэтииллэринэн, сэбиэскэй былаас саҕана даҕаны ситиһиллибэтэх кирбии ылылынна. Итиэннэ аны сайын от ыйын 1 күнүттэн эккэ техрегламент олоххо дьиҥ-чахчы киллэриллээри турдаҕына тоҕооһуннаран, хаһаайыстыба ирдэбилгэ толору эппиэттиир эбийиэктэммитэ сибиинньэни иитии салаата инникилээҕин кэрэһилиир.
