25 От ыйа 25.07
  • 24°
  • $ 86,55
  • 94,38

Хатастааҕы сибиинньэ иитэр комплекс кыстыкка киирдэ

14:02, 07 октября 2020
Текст:
Читайте нас на
Яндекс Новости
ЯДВ

Сибиинньэни иитэр Хатастааҕы комплекс балай эмэ бэлэмнээх кыстыкка үктэннэ. Пиэримэҕэ дьиэ кыылларын саастарынан арааран, үс сыаҕынан көрөллөр, суруйар  https://ulus.media


Хатастааҕы сибииньэ комплексын дириэктэрин солбуйааччы Любовь Дьячковская кэпсээбитинэн, сылга 13 тыһыынчаттан тахса чооску төрүүр, итинтэн 3 тыһыынчатын нэһилиэнньэҕэ атыылыыллар.

Билигин Хатас комплексыгар кыралыы-улаханныын 7,5 тыһыынча сибиинньэ баар. Төрүүр-ууһуур өттө 800-чэкэ буолар, ону тэҥэ 37 атыыр сибиинньэ турар. Кыраларыгар кулгаахтарын кырыйан, бэлиэтээн кэбиһэллэр.

Сэттэ-аҕыс ыйдаах сибиинньэлэри идэһэ оҥорон, этин атыыга ыыталлар. Иллэрээ сыл саҥа сыах киирэн, ыраас, хаачыстыбалаах бородууксуйа буолар. Киэҥ-куоҥ сыаҕы тыа хаһаайыстыбатын субсидиятынан оҥотторбуттара. Күҥҥэ хас эмэ туоннанан эт астанар, туйаҕын кытта тутталлар, сибиинньэ иһин-үөһүн сууйан ыраастыыллар.

Астыыр-үөллүүр сыах салайааччытын эбээһинэһин толорооччунан Анна Винокурова үлэлиир: “Сылга 7 тыһыынча сибиинньэни идэһэлиибит, ыйга таһаардахха 650-ну астыыбыт. Инньэ гынан сылга 5 тыһыынчаттан тахса туонна эт буолар. Иһин-үөһүн эптэххэ, 7 тыһыынчаттан тахса туоннаҕа тэҥнэһэр”.

Астыыр-үөллүүр сиргэ уонта тахса киһи түбүгүрэр. Наталья Попова ахсыс сылын үлэлиир: “Урут үксэ илиинэн буоллаҕына, билигин техниканы хото туһанабыт, мин сибиинньэ иһин сууйабын, ырытабын. Сарсыарда 08.30 тура тэбинэн, 16.30 бүтэбин“, – диир.

Бородууксуйа амтаннаах буоларыгар сибиинньэлэри тото аһатыахха-уотуохха наада. 16 туонна уотурба – бу күннээҕи аһылык орто нуормата. Аны туран уотурба биэс араас суортаах. Улахаттарга туспа, кыраларга букатын атын бытархайы былаан сиэтэллэр. Бу туһунан Алексей Козлов, кылаабынай зоотехник, салгыы быһаарбытынан, сылга 5 тыһыынча 442 туонна уотурба кэлэр, билигин 4,5 тыһыынча туонна миэстэҕэ сүөкэммит. Онон тохсунньуга тиийэр 500-чэкэ туонна баар. Аһылык соҕурууттан тиэллэр буоллар, биир тэрилтэ холугар уустук. Хата ону “Туймаада” агрохолдиҥҥа холбоһон урукку курдук кыһалҕа күөрэйбэт. Аны инникитин ветеринарнай пууну тэрийэр итиэннэ сибиинньэ тобоҕун гааһынан уматар былаһаакканы арыйар былааннаахтар.

Сибиинньэ комплексыгар уулаахтар туһунан бааллар, ийэ сибиинньэлэр атын сиргэ уйалаахтар, уотууга диэн анаан-минээн сэттэ-аҕыс ыйдарыгар диэри кэҥэс сиргэ туруоран, аһаталлар-сиэтэллэр.

Следите за самым важным и интересным в Telegram-канале и WhatsApp-группе ЯСИА