Хатаска эр дьон түмсүүлээх, үтүө дьыалалара үгүс, оҥорбуттара олохтоох, туппуттара тупсаҕай. Ырааһырдыныыга хамсаныылар, булка-аска даҕаны, чэгиэн — чэбдик олоххо тардыһыыга даҕаны. Аны бэрт сотору »Хатас хамсааһына» түмсүү биир үтүө дьыаланы оҥорорго былаанныыр, диэн суруйда Наталья Руфова.
Михаил Окороков төрөппүт уолаттарынаан Күөх сирэммитигэр оҥорбут »Тропинка здоровья» диэн бырайыага, »Хатас хамсааһына» түмсүү музейы өрөмүөннээһинэ, учуутал эр дьон оҕолору айылҕаҕа сыһыарар тэрээһиннэрэ, сылын аайы ыытыллар »Байанай» күрэхпит уо.д.а. Хатас олохтоохторун үөрдэр.
Бу күннэргэ «Саха» НКИК «Үүтээн кэпсээнэ» диэн биэриитигэр Хатас эр дьоно көһүннүлэр. Өссө да көстүөхтээхтэр. Бу биэриигэ кыттыбыт Э.Саввиновка, Н.Андросовка, Н.Поповка, М.Окороковка, П.Никифоровка махталбыт улахан. Биэрии тахсарыгар төһүү күүс буолбут А.С. Пинигиҥҥэ туспа махтал.
Чэгиэн-чэбдик олоххо тардыһар уолаттарбыт улахан, киэҥ далааһыннаах күрэхтэргэ, күөн көрсүһүүлэргэ кыайыылара-хотуулара туспа сэргэх кэпсээн буолар. Бу күннэргэ Чебоксары куоракка Арассыыйа чемпионатыгар кыттан, Иван Степанов боруонса мэтээллээх кэллэ. Бастакы тренерэ Г.Евсеев иитиллээччитигэр эрэлэ күүһүрбүтүн, махталын туһунан маннык диэн кэпсээтэ:
— Арассыыйа таһымнаах мас тардыһыыга бастыыр иһин күрэххэ кыайыылаах буолар сылын аайы ыараатар ыараан иһэр. Ол кистэл буолбатах. Бу көрүҥмүтүн атын эрэгийиэннэр сөбүлээн, ылынан, сыаллаахтык-соруктаахтык хомунан-тэринэн дьарыктанар буоллулар. Ол биһиги омук быһыытынан уратыбытын көрдөрөр дьарыкпыт спорт көрүҥэ буолан тахсан, саханы ааттатар эйгэбит кэҥээбитин көрдөрөр. Онтон күрэхтэһэр, күөн көрсөр уолаттарбытыгар күчүмэҕэйдэри үөскэтэрэ тулууру-дьулууру, туруулаһыы күүһүн, дьүккүөрү чиҥэтэр, киһи быһыытынан буһууну-хатыыны сытыырхатар. Итинник күрэхтэргэ кыттарга бэйэ бодону хомунуу, доруобуйа туругун тутуу ис-тас турук биир таһымҥа тиэрдии спортсмен ытык иэһэ буолар. Ол өй-санаа, эт-хаан сайдыытын таһымыттан быһаччы тутулуктаах. Ваня бу сырыыга ити эппит түгэннэрбин барытын өйдөөн туран, бастакы буолуу өрөгөй түгэнин куоттардым диэн санаатын түһэрбэккэ, сымыһаҕын быһа ытыран, хотторуу хомолтотугар оҕустарбакка, дьиҥ эр киһитин көрдөрөн, боруонса мэтээли ылла. Дьэ онон Ванябытын эҕэрдэлиэҕиҥ.
Бу курдук Хатас түмсүүлээх эр дьоно нэһилиэк олоҕун тупсараллар.
