Хайыһардьыттар төгүрүк сыл дьарыктаннахтарына эрэ кылгас кэм иһигэр буолар “хайыһар сезонугар” ситиһиилээх буолаллар. Сахабыт сиригэр хайыһар диэтиҥ да өйбүтүгэр Алдан оройуона киирэр. Ол мээнэҕэ буолбатах. Бу оройуон хайыһарынан дьарыктанааччыларга үчүгэйдик биллэр.
Алдаҥҥа дьыл хайа баҕарар кэмигэр дьарыктанарга, сайдарга-үүнэргэ табыгастаах буоларыгар анал тутуулардаах, роллернай трассалаах уо.д.а киин баар — РСШОР диэн ааттыыллар.
Хатас 7 нүөмэрдээх спортивнай оскуолатын кэлэктиибэ РСШОР кэлэктиибин кытта ыкса сибээстээхтик үлэлиир-хамсыыр. Хатас оҕолоро онно солбуһа сылдьан, этэргэ дылы, төгүрүк сыл бааллар.
Бу күннэргэ өрөспүүбүлүкэбит киэҥ киэлитин устун ахтылҕаннаах бырааһынньыкпыт – ыһыахтар ыытылла тураллар. Алдан куората онтон туора турбакка ыһыахтаата. Онно Алданнааҕы РСШОР түһүлгэтэ бастаата. Ол туһунан Хатастааҕы спортивнай оскуола тренерэ С.С.Контоев телефонунан бу курдук диэн кэпсээтэ:
— Ыһыах буоларын эрдэттэн билэр буоламмыт, этэргэ дылы, ох курдук оҥостон барбыппыт. Биһиги кыттыбыт тэрилтэбит — РСШОР бу Алдан куорат ыһыаҕар ,,Бастыҥ түһүлгэ» аатын ылла. Олус көхтөөхтүк кытынныбыт, актыыбынай төрөппүттэрбит сахалыы таҥастары Поротов Сайдам, Сандаар ийэлэринэн Елена Гаврильевнанан ыыппыттара. Оҕолорбут ырыаҕа, хомуска кыттан элбэх дьон биһирэбилин ыллылар. Бастаабыт үөрүүлэригэр ырыа ыллаабыт, барытыгар көхтөөхтүк кыттыбыт Сайдам Поротов аныгыскы хомуурга хоно өрүү сылдьара уонна аһылыга босхо буолар буолла.
— Степан Степанович, манна даҕатан Поротовтар дьиэ-кэргэттэри кэпсээн ааспаккын ээ.
— Кэпсээн бөҕө буоллаҕа. Поротовтар элбэх оҕолоох дьиэ кэргэн оҕо дьоҕура сайдарын туһугар олус бэриниилээхтик үлэлэһэр. Ол курдук улахан оҕолоро номнуо устудьуоннар, бэрт сотору төрөппүттэригэр көмө дьоно буолаары сылдьаллар. Миэхэ Сайдам уонна Сандаар утумнаахтык дьарыктаммыттара хас да сыл буолла. Ол тухары кэлии-барыы үбэ-харчыта, ол тухары экипировка, үчүгэй хайыһар уо.д.а. атыылаһыыта. Уопсайынан спорт ханнык баҕарар көрүҥэ киһиттэн эт-хаан, өй-санаа өттүнэн бэлэми ирдиирин ааһан, кырата суох үбү-харчыны эрэйэр. Мантан иҥнэн тохтоон хаалбыт оҕолор суох буолбатахтар, бааллар, ол кистэл буолбатах. Оннук түгэҥҥэ кими да буруйдуу, сирэй-харах анньар бырааппыт суох. Онон биһиги Сайдамнаах Сандаар төрөппүттэригэр Елена Гаврильевнаҕа, Михаил Анатольевичка махталбыт улахан. Елена бэйэтэ эмиэ сүрдээх талааннаах уонна олоххо тардыһыылаах киһи. Бу да сырыыга көстүүм бөҕөтүн илдьэ кэлэн, уолаттарыгар тигэн, араас киэргэллэри аҕалан төһүү күүс буолла. Сайдам хайыһарын ааһан, Хатастааҕы музыкальнай оскуолаҕа үөрэнэр, Алексей, Екатерина Егоровтар студияларыгар дьарыктанар. Бу хайысхаларга эмиэ кэккэ ситиһиилэрдээх оҕо. Дьокуускай куорат 12 нүөмэрдээх оскуолатыгар анал дириҥэтэн үөрэтэр предметтэрдээх кылааска үчүгэйдик үөрэнэр. Дьэ манна төрөппүт оруола хайдаҕын санаан кэбиһиий.
— Оннук бөҕө буоллаҕа. Бу сырыыга кимнээҕи илдьэ сылдьаҕын?
— Алдаҥҥа хайыһар хомууругар 17 хонукка кэлбиппит, быйылгы 2022 сылга, 5-с кэлиибит.Ороскуоппутун төрөппүттэр уйуналлар. Манна Россияҕа биллэр хайыһар киинигэр олоробут, дьарыктанабыт, сорох обургу оҕолорбут билигин Намҥа, Аммаҕа дьарыктаналлар. Мин илдьэ кэлбит оҕолорум сүнньүнэн кыра оҕолор, маннык ыраах айаҥҥа саҥа кэлбиттэр да бааллар: Поротов Сайдам, Поротов Сандаар, Иванова Нелли, Платонова Кристина, Иванов Саша, Барашкова Айыына, Семенова Маргарита, Герасимова Олеся.
— Маннык дьарыктар оҕолорго тугу биэрэллэрий?
— Тыый, биэрэллэрэ элбэх буоллаҕа дии. Бастатан туран, айанныы үөрэнэллэр, айанныыр эмиэ туһугар туспа үөрүйэх, онно атын дьону кытта алтыһаҕын, уопсай бэрээдэк диэн тугун билэҕин, туох, хаһан, ханна диэни бэрт түргэнник өйдүүр буолаллар. Аны уопсайга олороллоругар эмиэ туспа быраабыла, ирдэбил, бэл диэтэр, остолобуойга аһыылларыгар эмиэ бэрээдэк. Бу сайыҥҥы сбордартан элбэххэ үөрэнэллэр, күүс-уох өртүнэн, хайыһар техникатын баһылыыллара биллэ эбиллэллэр. Бүгүн обургу оҕолорум бу биир дьарыкка — уон биэстии килэмиэтири сырыттылар, икки кыраларым 2013 с.т — тоҕустуу кмилэмиэтир сырыттылар.
— Мантан сайын атыттар өссө кэлиэхтэрэ дуо?
— Кэлэр ыйдарга эмиэ кэлиэхпит, оҕолору уопутаах тренер Матаннанов К.К аҕалыаҕа.
— Степан Степанович сэргэх кэпсээниҥ иһин махтал. Бүгүҥҥү кэпсээммин Степан Степанович хоһоонунан түмүктүүбүн:
Көмүстээх Алдаҥҥа
Эдэркээн ыччаттыын
Күүрээннээх дьарыкка
Баарбыттан үөрэбин!
Дьоллоохпун дэнэбин!
Барыбыт аатыттан
Санааны кынаттыыр
Эҕэрдэ ыытабыт!!!
Ааптар: Наталья Руфова, Хатас
