23 От ыйа 23.07
  • 28°
  • $ 87,78
  • 95,76

Хатас бэтэрээн волейболистара, икки сыллаах тохтобул кэннэ, мээчиктэрин күөрэттилэр

10:45, 06 июня 2022
Текст:
Читайте нас на
Яндекс Новости
ЯДВ

Чэгиэн туруктаах сылдьарга маассабай спорт көрүҥнэрэ сүрүн төһүү күүс буолаллар. Хатас сиригэр-уотугар урут-уруккуттан волейбол, хоккей, остуол тенниһэ, хайыһар курдук көрүҥнэргэ сирдьит сулус оҥостор, тумус туттар дьонноохпут.

Коронавирус пандемиятынан биллэриллибит хаарчахтааһыннар уһулланнар, күрэхтэр, күөн көрсүһүүлэр, турнирдар, табаарыстыы көрсүһүүлэр, уо.д.а. хайысханан тэрээһиннэр Хатаска саҕаланнылар.

Биир оннук тэрээһин туһунан нэһилиэкпит убаастабылын, ытыктабылын ылбыт үтүөкэн киһибит Р.И.Жирков маннык диэн сэһэргээтэ:

— Волейбол Хатас сиригэр сөбүлэнэр уонна сайдыбыт спорт көрүҥүнэн буолар. Быйыл, СахаВА (бэрэссэдээтэл С. И. Иванов) 30 сыллаах үлэтин бэлиэтиир сылыгар, элбэх былааннаммыт күрэхтэһии, тэрээһиннэр Саха сиригэр ыытылла тураллар. Ол курдук, Хатас нэһилиэгэр ыам ыйыгар 20-с төгүлүн «Ныһый -2022» волейболга хамаанданан бэтэрээннэр (55 уонна онтон аҕа саастаах дьон) ортолоругар өрөспүүбүлүкэ таһымнаах күрэхтэһии буолан ааста.

Бу күрэх аан бастаан 2000 сыллаахха Хатас биир ытык сиригэр Ныһыйга буолбута. Онтон ыла сыл аайы ыытыллан, үгэскэ киирбит күөн көрсүһүү, сыллааҕы үлэ түмүгүн көрүү курдук сыаналанар тэрээһин буолар. Хамсык ыарыы өрө туран, арай 2020, 2021 сылларга кыайан ыытыллыбатахтара.

Күрэхтэһиини ,, СахаВА ,, Хатас» ВК (салайааччы — Керегяев Г. Л., тэрийээччи — Жирков Р.И.) салалтата уонна кулууп бэтэрээннэрэ сааһы атаара, сайыны көрсө волейбол бырааһынньыгын ыам ыйын бүтэһик нэдиэлэтигэр эбэтэр бэс ыйа саҕаланыыта тымныы, итии, ардах да буоллун, толкуйдаан тэрийэн, үбүлээн ыыталлар. Бастакы күрэхтэһиилэргэ волейболтан ураты, күрэхтэһии чэрчитинэн, өйү-санааны сайыннарар мындыр оонньуулар араас көрүҥнэрэ (дуобат, саахымат, хаарты уо. д. а.) киирэллэрэ. Ити сылларга куруутун 5-7 күүстээх өрөспүүбүлүкэ уонна Дьокуускай куорат хамаандалара кытталлара.

Кэнники 3 сылга, кэлбит хамаандалар оонньооччуларын жеребьёвканан арааран, саҥа хамаандаларга арааран, оонньуулар олус көхтөөхтүк, күүрүүлээхтик бараллар. Быйыл ,,Хатас» ВК (кап. Дьяконов Н. Н.), ,, Аргыс» ВК (кап. Решетников И. Д.), ,, Медик» ВК (кап. Чичигинаров В. И.), ,, Лыгый» ВК (кап. Тирютин Г.С.), ,, Олимп» ВК ( кап. Ларионов А.Д.) уонна саҥа ,, Виктория» ВК (кап. Дьяконов М.Р.) кулууптар оонньооччулара күрэхтэһэ кэлбиттэр.

Күрэхтэһии аһыллыытыгар СахаВА бэрэссэдээтэлэ С.И. Иванов уонна тэрийээччи Р.И. Жирков турниры арыйан уонна «Хатас» ВК бастыҥ уонна үбүлүөйдээх дьонноругар наҕараадалары туттардылар.

Күрэхтэһии түмүктэрэ:

1 миэстэ — ,, Сайсары » хамаанда (кап. Чичигинаров В. В.).,
2 миэстэ — ,, Ныһый» хамаанда (кап. Еманов В.В.,

3 миэстэ — ,, Ураанхай» (кап. Саввинов А. А.).

Күрэхтэһии бастыҥ оонньооччулара (номинациялар кыайыылаахтара):
1. ,, Бастыҥ оонньооччу»- Чичигинаров В.В. («Сайсары» хамаанда),
2. ,, Бастыҥ охсооччу»- Саввинов А. А. (,, Ураанхай» хамаанда),
3. ,, Бастыҥ быраҕааччы» — Атласов Р.Р. (,, Сайсары»хамаанда).
4. ,, Саамай туһалаах оонньооччу» — Афанасьев П.Г. (,, Ураанхай» хамаанда).

1 миэстэни ылбыт ,, Сайсары» хамаанда оонньооччулара П. И. Яковлев — Саха сирин биллиилээх тренерэ уонна волейболиһа ,,Волейбол-гармония нашей жизни»(2021) диэн суруйбут кинигэ-альбомнарын бэлэх быһыытынан туттулар. Бары ыалдьыттар уонна кыттааччылар эбиэттээн, айылҕаҕа сынньанан, үөрэн-көтөн тарҕастылар.

Волейбол биир уратыта хамаанданан оонньуу буолан, хаһан даҕаны хатыламмат түгэннэрдээх, күүтүллүбэтэх көстүүлэрдээх, умсугутуулаах оонньуу буолар. Манна »солист» суох, манна хамаанда баар. Ол аата түмсүүлээх, сомоҕолоһуулаах буолуу, биир киһи барыларын, бары биир киһи туһугар диэн өйдөбүлүнэн киирсии буолар.

Күөн көрсүбүт хамаандалар орто саастара 60-65 саас.

Следите за самым важным и интересным в Telegram-канале и WhatsApp-группе ЯСИА