Саха сиригэр үс көлүөнэ Новиковтарга уон уонна онтон элбэх оҕо төрүүр. Эбэлэрэ – Елена Новикова – 11 оҕону төрөтөн, иитэн таһаартаабыта. Бачча оҕо кини уолугар Петрга уонна кини кэргэнигэр Татьянаҕа күн сирин көрбүтэ. Билигин кинилэр кыыстара Туяра уон оҕолоох дьоллоох ийэ.
Эмис нэһилиэгин бочуоттаах олохтооҕо, тыа хаһаайыстыбатын бэтэрээнэ, «Материнская Слава» уордьаннаах Татьяна Новикова кэргэнин Бүөтүрү кытта 11 оҕоломмуттара. Бүгүн кинилэр 49 сиэннээхтэр уонна 58 хос сиэннээхтэр. Герой ийэ 1956 сыллаахтан «Победа» сопхуоска ыанньыксыттаабыта, тыа хаһаайыстыбатын эйгэтигэр үлэлээбит ыстааһа — 44 сыл.
Үлэ уонна улахан дьиэ кэргэни көрүү-истии таһынан, уопсастыбаннай үлэҕэ көхтөөҕө. 80-с сылларга хас да сыл нэһилиэгэр депутаттаабыта, хорга ыллыыра, илиитигэр талааннааҕа.
Татьяналаах Бүөтүр кыыстара Туяра кэргэнинээн Сергейдыын 10 оҕоломмуттара.
Туяра «Чуораанчык» дьыссаакка техүлэһиттээбитэ, билигин Е.А. Захарова-Саха Күөрэгэйэ аатынан култуура киинигэр үлэлиир. Кини салайыытынан Эмискэ хаһыс да сылын «Биһик» элбэх оҕолоох ийэлэр кулууптара үлэлиир. Кинилэр ыарахан балаһыанньаҕа түбэспит ыалларга уонна эдэр ийэлэргэ көмөлөһөллөр.
Бэс ыйын 23 күнүгэр «Демографическое развитие Дальнего Востока и Арктики» кэмпириэнсийэ кэмигэр Ил Дархан Айсен Николаев Татьяна Новиковаҕа «Саха Өрөспүүбүлүкэтигэр Ийэҕэ улахан махтал» наҕарааданы, оттон Туяра Устиноваҕа — «Гражданскай килбиэн» бэлиэни туттарда.
«Төрөөһүҥҥэ биһиги өрөспүүбүлүкэбит инники күөҥҥэ сылдьарынан киэн туттабыт. Көлүөнэнэн элбэх оҕолоох ыаллар — бу олус үчүгэй үгэс. Маннык «бастыҥ ыалы» уопсастыба убаастыыр, дьон махтанар, холобур буолаллар. Биһиги уопсай сыалбыт – Россия дьонунан баай буолуута!» – диэтэ Айсен Николаев.
Сиһилии https://ysia.ru/unikalnoj-mnogodetnoj-seme-vruchil-nagrady-glava-yakutii/
