15 От ыйа 15.07
  • 22°
  • $ 87,74
  • 95,76

Ханнык хайысхалар бастатан туран үбүлэнэллэрин Евгений Чекин билиһиннэрдэ

18:41, 23 апреля 2018
Текст:
Читайте нас на
Яндекс Новости
ЯДВ

«1 млрд. 94 мөлүйүөн суумалаах босхоломмут бүддьүөт ассигнованиета бүддьүөт үлэһиттэрин хамнастара үрдээбитин уонна Өрөспүүбүлүкэҕэ хамнас алын кээмэйэ эбиллибитин хааччыйарга туттуллуоҕа”, — диэн муус устар 23 күнүгэр Бырабыыталыстыба бэрэссэдээтэлэ Евгений Чекин Ил Түмэн пленарнай мунньаҕар иһитиннэрдэ.     


Кини этэринэн, аҥаардас хамнас алын кээмэйин оройуоннай коэпписийиэни, хотугу эбиискэни ааҕан туран, 2018 с. тиийинэн олорууну кытта тэҥнииргэ 4 млрд. 42 мөл. наада.

Урукку сылы кытта тэҥнээн көрдөххө, бүддьүөт макроэкономическай көрдөрүүтэ тупсубут: 2018 с. тохсунньу-олунньу ыйдарын 2017 с. бастакы икки ыйын кытта холоотоххо, ВРП — 7%, сүрүн хапытаалга инвестиция — 12%, бүддьүөккэ нолуок уонна атын харчы киириитэ — 23% үрдээбит.

Маны таһынан, Саха сирин суолун-ииһин пуондатыгар 1 млрд. 483 мөл. көрүллүөхтээҕэ этилиннэ. Судаарыстыбаннай мэктиэ быһыытынан, оҕолору оскуола иннинээҕи уонна начаалынай, орто үөрэҕинэн босхо хааччыйарга 1 млрд. 598 мөл. ирдэнэр.

Нэһилиэнньэҕэ чэпчэтиллибит төлөбүрү киллэрии түмүгэр, хомунаалынай хаһаайыстыба тэрилтэлэрэ ороскуотурбуттарын уонна дохуоттарын ситэри ылбатахтарын толуйарга 8 млрд. 817 мөл. наадата бэлиэтэннэ.

Евгений Чекин бу хайысхалар, ол иһигэр босхо орто үөрэхтэнэргэ Төрүт сокуонунан бигэргэммит эбэһээтилистибэ, хамнас төлөөһүнэ, бастатан туран, үбүлэниэхтээхтэрин чорботто.

Премьер бүддьүөтү тыырыыга сыаналаах атыылаһыыттан аккаастаныы, сорох тэрээһиннэр ороскуоттарын аччатыы туһунан кэпсээтэ. Бу ыйытыктары дьүүллэһиигэ оробуочай бөлөххө Судаарыстыбаннай Мунньах бюджетнай кэмитиэтин чилиэннэрин таһынан, Ил Түмэн бастайааннай кэмитиэттэрин бэрэссэдээтэллэрин киллэрэр наадалааҕын ыйдылар.

2018 с. судаарыстыбаннай бүддьүөт ороскуота 194 млрд. 629,5 мөл. тэҥнэстэ.

Марианна Тыртыкова, «Саха сирэ», edersaas.ru

Следите за самым важным и интересным в Telegram-канале и WhatsApp-группе ЯСИА