Быйыл иккис төгүлүн ыытыллыбыт Саха Өрөспүүбүлүкэтин идэлээх сойуустарын федерациятын ханаат тардыһыытыгар Кубогын күрэһэр уон үс үлэ кэлэктиибэ кытынна.
edersaas.ru
«Туймаада» стадиоҥҥа буолбут күрэхтэһиигэ сүрүннээн «Туймаада-нефть» хампаанньа үлэһиттэриттэн турар агромышленнай комплекс хамаандата үһүс бириистээх миэстэҕэ таҕыста. Санатар буоллахха, иллэрээ сыл АПК идэлээх сойууһун спартакиадатыгар бу уолаттар тэҥнээхтэрин булбатахтара.
Өрөспүүбүлүкэтээҕи таһымнаах күрэскэ бастакытын кыттыбыт олорор дьиэ-уот, коммунальнай хаһаайыстыба баабыйдара иккис буоллулар.
Уу суолун үлэһиттэрин идэлээх сойууһун хамаандата былырыыҥҥы ситиһиитин хатылаата — бастакы миэстэни ылан, көһөрүллэ сылдьар Кубогы төттөрү илдьэ барда.
Кыайыылаах уонна миэстэлэспит хамаандалар мэтээллэринэн, дипломнарынан, анал бириистэринэн биһирэннилэр.
Роман Попов
Ааптар хаартыскаҕа түһэриитэ.
