23 От ыйа 23.07
  • 20°
  • $ 87,78
  • 95,76

«Халыма» суолугар муус түһүлгэ аһылынна

17:30, 21 марта 2018
Текст:
Читайте нас на
Яндекс Новости
ЯДВ

Таатта улууһун Тыараһа нэһилиэгин Арыылааҕар бэрт сэргэх муус түһүлгэ баар буолла.


Николай Аммосов төрүттэрин сиригэр-уотугар, биир дойдулаахтарыгар үтүө саҕалааһына былырыыҥҥыттан саҕаламмыта. «Таатта-Арыылаах» муус түһүлгэҕэ былырыын эмиэ элбэх киһи кэлэн ыалдьыттаабыт буоллаҕына, быйыл даҕаны Дьокуускай куорат, ыаллыы сытар Чурапчы, Томпо улуустарыттан бүтүн бөлөҕүнэн кэлэн, сааскы сайаҕас салгынынан дуоһуйа тыыннылар.

Тарбаҕар талааннаах мындыр уус Николай Павлович толкуйунан элбэх муус оҥоһуктар күн уотугар күлүмүрдүү оонньууллар. Оҥоһуктар бары ураты тиэмэлээхтэр, саха остуоруйаларыттан, үһүйээннэриттэн түспүт дьоруойдар өбүгэлэрбит олохторугар-дьаһахтарыгар төнүннэрэргэ дылылар.

Киэҥ сыһыы, харах ыларынан маҥан хаарынан бүрүллэн да турдар, хаһаайыттар ыалдьыттары аралдьытар сирдэ син биир киэҥ-куоҥ. Холкутук сылдьан үрдүк сыыртан сырылыыгын, катокка хатыыскалыыгын, араас аттракционнарга оонньуугун уо.д.а. Тоҥо быһыытыйдаххына даҕаны, субу аттыгар сылабаардаах чаай оргуйар, шашлык минньигэс сыта-сымара муннугар саба биэрэр.

Дьокуускайтан эбэтэр федеральнай суолунан айаннааччылар анаан-минээн тохтоон ааһыахтарын, эттэрин-сииннэрин «уһугуннаран» ааһыахтарын сөп эбит. Биһиги сылдьарбытыгар муус түһүлгэттэн арыый тэйиччи сиргэ араас массыына аараан турарын көрдүбүт.

Биһиги эмиэ, алҕас тохтоон ааспыт дьон, оҕолорбут сааскы өрөбүллэрин кэмигэр анаан-минээн сынньана кэлэргэ быһаарынныбыт. Манна даҕатан эттэххэ, «Халыма» федеральнай суолга маннык сынньанар, аралдьыйар муус оҥоһуктардаах комплекс ханна да суох.

Следите за самым важным и интересным в Telegram-канале и WhatsApp-группе ЯСИА
Тутаах тыллар