Анал байыаннай дьайыы кыттыылаахтарын дьиэ кэргэттэрин уонна сааскы халаан уутуттан эмсэҕэлээбит ыаллар 2,5 тыһ.тахса оҕото өрөспүүбүлүкэ лааҕырдарыгар сынньанна. Бу туһунан Саха сирин баһылыга Айсен Николаев бэйэтин телеграм-ханаалыгар суруйда.
«Оҕо-аймаҕы көрөр-истэр биһиги сүрүн сыалбыт буолар. Өрөспүүбүлүкэ дойдуну көмүскүүр дьоммут дьиэ кэргэттэрин уонна уустук балаһыанньаҕа киирбиттэри өйүүр бырагыраамалары олоххо киллэрэр. Оҕо лааҕырдарыгар босхо путевкалары биэрэр бырагыраама маннык өйөбүллэртэн биирдэстэрэ буолар», – диэтэ Айсен Николаев.
Аҕа баһылык бэлиэтииринэн, лааҕырдарга оҕолору идэтийбит педагогтар, уопуттаах баһаатайдар уонна мэдиссиинэ үлэһиттэрэ көрөллөр-истэллэр. Оҕолор доруобуйаларын уонна өйдөрүн-санааларын чэбдигирдэр бырагыраама бэлэмнэммит.
«НВК Саха» телеграм-ханаала
