Аллараа Халыма оройуонуттан “Турваургин” көс аҕа ууһун общинатын биригэдьиирэ Николай Волков Саха сирин дьокутааттарыгар баар кыһалҕалар тустарынан кэпсээтэ.
“Мин төрүт уус табаһыппын, билигин биригэдьиирдиибин. Үс оҕолоохпун, хас сайын ахсын туундараҕа бара сатыыбыт. Кыахпыт тиийэринэн үлэлиибит, көмө эрэ наада”, — диэтэ сийиэс делегата, табаһыт.
Саамай кыһалҕабыт –хамнаспыт хойутуура, төрдүс ыйыныла иликпит. Көһө сылдьар табаһыттарга Колымскайга интэринээт-оскуоланы сабыы кыһалҕаны үөскэттэ.
“Урут интэринээттээх этибит, онон ыаллар туундараҕа холкутук бараллара. Билигин ити суох буолан, чуум үлэһиттэрэ сэлиэнньэҕэ оҕолорун кытта хааларга күһэллэллэр”, — диэтэ Николай Волков.
“Билигин ииримтийии бэлиэтэнэн, харантыын биллэриллибитэ, онон эти сиир кыахпыт суох. Бэтэринээрийэ департамена община вакцинаны бэйэтэ атыылаһыахтаах диир”, — диэтэ салгыы вакцинация туһунан этэригэр.
Кини ыччаты бу салааҕа үлэлэтэргэ хамнас кырата уонна тиэхиньикэ суоҕа атахтыырын тоһоҕолоон бэлиэтээтэ.
