Тиһэх чуораан чугдаарара чугаһаан, 11 кылааһы бүтэрээччилэр оскуолаларын аанын бүтэһиктээхтик сабыахтара. Онон оҕолор олох киэҥ аартыгар үктэнэллэригэр төрөппүт уонна оскуола улахан оруоллаах.
Дьокуускай куорат 2-с нүөмэрдээх оскуолатын дириэктэрэ Алексей Семеновы кытта кэпсэтиибитигэр, оскуолаҕа араас өйдөөх-санаалаах, бэйэ-бэйэлэригэр майгыннаспыт оҕолор үөрэнэллэрин этэр. «Билигин урукку курдук, оскуола иннигэр иитии-үөрэтии сыала-соруга турар. Урут оҕону үлэҕэ үөрэтии, сыһыарыы эрдэтинэ, кыра сааһытан саҕаланара. Бары өйдүүргүт буолуо, урут сайын окко үлэлиирбит, хотонтон хаар түһэрэрбит, күһүн хортуоппуй хостуур этибит. Оттон билигин саҥа сокуон быһыытынан уонна аныгы олох ирдэбилинэн, оҕону үлэлэтэр быраааппыт суох», – диэн Алексей Климентьевич бэйэтин санаатын кытары үллэстэр.
Билиҥҥи олус тэтимнээх кэмҥэ, оҕолору үөрэхтэрин таһынан эбии дьарыктыы сатыыллар. Холобур, Дьокуускай куорат 2-с нүөмэрдээх оскуолатыгар скалодром тэрийэн улахан күрэхтэһиини, «Бродниковские чтения» диэн өрөспүүбүлүкэтээҕи бэһис научнай-практическай конференцияны ыыппыттар. Бу тэрээһин биллиилээх поэт, учуутал Алексей Бродников 95 сааһыгар ананан, Чурапчы улууһун Төлөй аграрнай оскуолатыгар ыытыллыбыт. Маны таһынан политехническай оскуола буолалларын быһыытынан, бу хайысханы күүскэ сайыннаран оҕолор робототехинньикэҕэ, Сisko сетевой академияҕа сөбүлээн дьарыктаналлар. ИТ эйгэтигэр үлэлиэн баҕалаах оголорго, биллэн турар, бу төһүү күүс буолар.
«Оҕо саас кэрэ, умсулҕанаах, көрдөөх-нардаах буоларын туһугар, үгэскэ кубулуйбут тэрээһиннэрдээхпит. «Мистер Тускул» диэн уолаттарга аналлаах күрэххэ быйыл 7-8 кылаас уолаттара көхтөөхтүк кыттан, 7-с «в» кылаас үөрэнээччитэ Тамерлан Филиппов «Мистер Тускул» аатын ылбыта. Оттон сайыҥҥы өттүгэр үөрэнээччилэрбитигэр анаан «Спутник» лааҕыры үлэлэтэбит. Манна оҕолор дуоһуйа сынньанан, сөтүөлээн, иҥэмтиэлээх аһылыгынан аһаан, сайыннарын бэркэ атаараллар», – диэн учууталлар кэпсииллэр.
Диана Максимова, 11 кылаас үөрэнэччитэ:
—Мин быйыл тапталлаах оскуолабын бүтэрэбин. Сотору кэминэн бүтэһик чуораан чугдаарыа. Бу миэхэ олус суолтааах кэм. Санаабар, оҕоо сааһым ааһан эрэр курдук. Ол эрээри санаан көрдөххө, олоҕум биир саамай улахан кэрдиис кэмэ тапталлаах 2-с нүөмэрдээх оскуолабар ааспыт эбит. Үөрүү да, хомолтолоох да түгэн үгүс.
Александра Сивцева, 1 кылаас үөрэнэччитэ:
—Мин быйыл аан бастаан Дьокуускай куорат 2-с нүөмэрдээх оскуолатыгар киирбитим. Кылааспар Сайыына, Айталыына, Айаал, Виктория диэн доҕоттордоохпун. Ордук математиканы, уус-уран ааҕыыны сөбүлүүбүн. «Битва хоров» диэн оскуолабыт курэхтэһиитигэр кыайаммыт, киинэ-тыйаатырыгар босхо сылдьыбыппыт. Үөрэҕим таһынан художественнай гимнастиканан дьарыктанабын. Биһигини бииллиилээх спортсменка Виолетта Иванова дьарыктыыр.
