Чурапчы улууһун Хайахсытыгар Владислав Поисеев хотонугар бу сарсыарда игирэ ньирэйдэр күн сирин көрдүлэр.
Чурапчы улууһугар сүөһү-сылгы ииттэн олорор кэтэх хаһаайыстыбалаах эдэр дьон үгүс. Кинилэртэн биирдэстэрэ Хайахсыт нэһилиэгин олохтооҕо, норуот айымньытын дьиэтин дириэктэрэ, ырыаһыт, мусукаан Владислав Поисеев буолар.
«Бу сарсыарда хотоммор 7.30 чааска тахсыбытым, былырыын дьоммуттан ылбыт ынаҕым игирэ ньирэйдэри төрөөбүт. Атыырдаах тыһы. Үөрдүм ахан. Тутатына Лоокуут уонна Ньургуһун диэн сүрэхтээтим, эрдэ икки ынаҕым төрөөбүтэ. Өссө да төрүөхтээх сүөһүм элбэх. Саҥа туттубут хотоммор сүүрбэччэ сүөһүнү кыстаттым. Чэ итинник», — диэн Владислав төлөпүөнүнэн бэрт түргэнник сэһэргээтэ, диэн СИА-ҕа Сэмэн Жендринскэй суруйда.
Оттон Амма улууһун Эмиһигэр Дмитрий Пестерев хаһаайыстыбатыгар ынах хайдах төрүүрүн видеоҕа түһэрэн ыытта 18+.
Муус устар ыйга ынах маассабайдык төрүүр кэмэ. Бары хаһаайыстыбаларга 160,8 тыһыынча хоноҕор муостаах баар. Тыа хаһаайыстыбатын министиэристибэтэ иһитиннэрбитинэн, ыанар ынах ахсаана — 63,4 тыһыынчаттан тахса. Муус устар 2 күнүнээҕи туругунан, 18,1 тыһыынча ынах төрөөтө.
