15 От ыйа 15.07
  • 20°
  • $ 87,74
  • 95,76

“Хайа аарымалара”. Премьера!

19:42, 15 мая 2018
Текст:
Читайте нас на
Яндекс Новости
ЯДВ

Саха тыйаатыра Италия уһулуччулаах суруйааччыта, Нобелевскай бириэмийэ лауреата (1934) Луиджи Пиранделло “Гиганты горы” диэн ситэри суруллубатах тиһэх айымньытынан “Хайа аарымалара” испэктээкилин ыам ыйын 18, 19, 20 күннэригэр көрөөччү дьүүлүгэр таһаарар.


Андрей Борисов туруоруута, режиссер Роман Дорофеев, Михаил Егоров сценографията, Сардаана Федотова көстүүмнэрэ, айымньыны Мария Докторова тылбаастаата.

Режиссер этэринэн, испэктээги икки састаап оонньуур. Оруоллары, уопуттаах артыыска Лена Румянцеваны сэргэ сүрүннээн эдэр артыыстар толороллор. Графиня Илсены эдэр артыыска Жанна Ксенофонтова оонньуур састаабыгар Граф оруолугар — Игорь Говоров, атын оруолларга Илья Портнягин уонна Ильяна Павлова. Оттон Лена Румянцева Илсены оонньуур састаабыгар Граф оруолугар – Валентин Макаров, атын оруолларга Альберт Алексеев уонна Ньургуйаана Шадрина.  Манна, Лена Румянцева уонна Жанна Ксенофонтова, атыттар эмиэ, оруолларын бэйэ-бэйэлэригэр маарыннаспаттык, тус-туспатык, уратылаахтык оонньууллара сэрэйиллэр. Онон, иккиэннэрин көрөр, арааһа, олус интэриэһинэй буолуо.

Андрей Саввич, интеллектуальнай тыйаатыр диэн өйдөбүлү киллэрэр наада диэбитэ ыраатта. Кини ыра санаата диэххэ сөп. Көрөөччүгэ, европейскай тыйаатыр баар буолуон сөп дуо, диэн… Биллэн турар, бэлэмэ суох көрөөччүгэ уустук испэктээк буолуо дии саныыбын.  Айымньы бэйэтэ уустук. Киһи хаста даҕаны аахтаҕына өйдүүр пьесата. Онон, көрөөччү  Пиранделло суруйуутун ааҕара, билсэрэ ордук. 

Биһиги сорукпут – тыйаатыр иһигэр тыйаатыры көрдөрүү. Пьесатыгар да оннук. Артыыстар артыыстары оонньууллар. Ол артыыстар гиганнарга испэктээкил көрдөрүөхтээхтэр. Ол  иһин, бу – хас да хаттыгастаах пьеса буолар. Бастаан, бу кимий, тугуй, диэн… соччо өйдөөбөккүн. Онтон, хас биирдии сцена киирэн өйдөтөн иһэр, өйдөтөн иһэр…  Бу пьеса Арассыыйаҕа иккис эрэ туруута. Европаҕа элбэхтик турдаҕа. Оттон биһиги дойдубутугар аан бастаан Фоменко Мастарыскыайа тыйаатыр туруорбута. Испэктээкил сүрүн ис хоһооно – искусство туһунан. Искусство туһунан түөрт миф. Быһаччы эттэххэ – тыйаатырга таптал туһунан пьеса.

Көрөөччү тута өйдүө дуо, диэн, сэрэхэчийии баар, ол гынан баран, бука бары кыһаллабыт, көрөөччү ылынарын курдук оҥоруохтаахпыт. Итиэннэ, бу – Маастары кытта саҕаланыаҕыттан бүтүөр  диэри бииргэ үлэлэһэн оҥорбут айымньыбыт – оҕобут тэҥэ кэриэтэ буоллаҕа.  Бу биһиэхэ улахан үөрэх, — диэн санаатын үллэһиннэ режиссер Роман Дорофеев.

Татьяна МАРКОВА.

Следите за самым важным и интересным в Telegram-канале и WhatsApp-группе ЯСИА