Илиҥҥи экэнэмиичэскэй пуорумҥа Владивосток куоракка аан дойдуга аан бастаан хабылык уонна хаамыска саха төрүт оонньуутугар чөмпүйэнээт ыытылынна. Күрэхтэһиигэ Индияттан, Кыргыстаантан, Мароккоттан, Египеттэн, Монголоияттан о.д.а. омук дэлэгээссийэлэрэ кытыннылар, сүрдээҕин сэргээн уҥа-хаҥас быраҕыстылар. Хабылык, хаамыска күрэхтэһиитигэр Сирия, Ангола, Марокко бэрэстэбиитэллэрэ бастаан бар дьону сөхтөрдүлэр, суруйда Саха парламент саайт.
«Сахалыы остуол ооньууларыгар Владовостокка буолбут күрэхтэһии миэхэ олоҕум, оҕо сааһым сорҕотун кытта сибээстээх. Оҕо сылдьан кыһыҥҥы уһун киэһэлэри хабылыктаан-хаамыскалаан атаарарбыт. Саха төрүт оонньуута хабылык уонна хаамыска мас-реслинг курдук аан дойду таһымыгар тахсыбытыттан, араас дойдулартан кэлбит спортсменнар уонна устудьуоннар ардахтан толлубакка омун-төлөн буолан киирсибиттэрин көрөн олус долгуйдум уонна үөрдүм.
Маннык оонньуу пуорум дьыалабыай өрүтүн сэргэхситэр, Арассыыйа норуоттарын төрүт култуураларыгар интэриэһи үөскэтэр. Чөмпүйэнээт аһыллыытыгар Ил Дархан Айсен Николаев кэлэн тыл эппитигэр, биһигини өйөөбүтүгэр төрүт култуурабытын кэнэҕэс көлүөнэҕэ тиэрдии улахан суолталааҕын өйдөөтүбүт.
Биһиги аан дойдуга остуол ооньууларыгар саха национальнай успуордун биир көрүҥүн арыйан, эдэр ыччат өбүгэ үгэһин харыстыырыгар уонна саҥа чыпчаалларга дьулуһарыгар угуйабыт», — диэн саха төрүт остуол оонньууларын Федерациятын бэрэсидьиэнэ Ольга Григорьева санаатын үллэстэр.
Хабылык, хаамыска толкуйу тобуларга, өйү эрчийэргэ үөрэтэр, илии сылбырҕа хамсаныытын сайыннарар, өбүгэ үтүө үгэһигэр ытыктабыллаах сыһыаҥҥа иитэр. Бу остуол оонньуутун «Көмүлүөк» маҕаһыыннарыттан атыылаһыахха сөп. Саха иһитин, туттар тэрилин оҥорор хампаанньа Илиҥҥи экэнэмиичэскэй пуорумҥа кыттан, култуурунай дипломатия сайдарыгар, Арассыыйа норуоттарын төрүт үгэстэрин аан дойду таһымыгар таһаарарга сэмэй кылаатын киллэрдэ. Өбүгэ төрүт оонньуутун национальнай киэн туттуу быһыытынан көрдөрдө.
Онон Илиҥҥи экэнэмиичэскэй пуорум Саха Сиригэр бырамыысыланнас, энергетика сайдарыгар, олохтоох оҥорон таһаарыы, атыы-эргиэн Арассыыйа киэҥ ырыынагар тахсарыгар, саха төрүт остуол оонньуулара аан дойду үрдүнэн саҥа биһирээччилэрин булалларыгар сүрүн тирэх буолара саарбахтаммат.
This post was published on 17.09.2025 17:21 17:21