25 От ыйа 25.07
  • 30°
  • $ 86,55
  • 94,38

Хаандыгаҕа үөрэх тэрилтэлэрин дьаарбаҥката

16:25, 18 мая 2016
Читайте нас на
Яндекс Новости
ЯДВ

Томпо улууһун киинэ — Хаандыга быйыл төрүттэммитэ 75 сыла бэлиэтэнэр. Ол чэрчитинэн ыытыллар тэрээһиннэргэ бөһүөлэк тэрилтэлэрэ кытталлар.

Холобура, үөрэх тэрилтэлэрэ дьаарбаҥка ыыттылар. Тэрээһиҥҥэ орто оскуола, гимназия, үс уһуйаан, искусство оскуолатын, оҕо айар киинин, үөрэх салаатын үлэһиттэрэ кытыннылар.

Ырыа-тойук дьиэрэйдэ. Кокошниктаах нуучча толуу-мааны дьахталлара частушкалаатылар, баян тыаһа дьиэрэйдэ. Дэриэбинэ бастыҥ эр киһитэ бөтүүк таас кэмпиэттээх лотуогуттан оҕо-аймах арахпата. Ас-үөл арааһа барыанньатыттан, кэнсиэрбэлэммит оҕуруот аһыттан ыһаарыламмыт собоҕо, туустаах сордоҥҥо тиийэ, оҕуруот аһын уонна сибэккилэр үнүгэстэрэ, араас баайыы таҥас-сап, куукунаҕа туттуллар тэриллэр уо.д.а. атыыланна.

Тэрилтэлэр бары сандалыларын, бүлүүдэлэрин араас темаҕа сөп түбэһиннэрэн киэргэппиттэр. Ол курдук «Солнышко» уһуйаан үлэһиттэрэ «Остров сокровищ» диэн биллэр литературнай айымньынан бэлэмнэммиттэр. Онноооҕор астарын сыаналарын быспыт кумааҕыларыгар «Веселый Роджер» бэлиэтэ уруһуйдаммыт. Дьон үөрэ-көтө пират дьахталлартан ону-маны атыыластылар. Хаандыга оскуолата «Русская деревня» буолбут. Сандалыга тульскай самовар аттыгар үксэ бурдук ас арааһын тардан кэбиспиттэр.

Тыаттан төрүттээх дьон үөрэх салаатын үлэһиттэрин остуолун тула муһуннубут. Онно соччо-бачча атын аска кыһаммакка ыһаарыламмыт соболорго ымсыырдыбыт. «Уурдарбыттара,» — диэн буолла. «Эбии төлүүбүт», — диэн көрдүбүт да чугаһаппатылар. Күүтүүлээх куспут суох эбит.

Елена Винокурова, улуустааҕы үөрэх салаатын иитэр үлэҕэ салайааччыта кэпсиир:

Бу дьаарбаҥка үөрэх тэрилтэлэрин икки ардыларыгар биэс түһүмэхтээх күрэх биир түһүмэҕэ. Бастакы миэстэ 6200 солкуобайы киллэрбит Хаандыга орто оскуолата, иккис миэстэ – 6000 солк. киллэрбит искусство оскуолата, үһүс миэстэ – 5400 солк. киллэрбит «Сонлнышко» уһуйаан буоллулар. Киирбит үбү ааҕан-суоттаан баран тэрилтэлэр бэйэлэрэ Хаандыга юбилейыгар анаан ыытыллар тэрээһиннэргэ көмө оҥорорго фондаҕа биэриэхтэрэ.  

Следите за самым важным и интересным в Telegram-канале и WhatsApp-группе ЯСИА