Дьокуускай куорат федеральнай суута 24 саастаах киһиэхэ бириигэбэр таһаарда. РФ Холуобунай кодексатын 264-с ыст. 4-с чааһынан, ол эбэтэр, итирик киһи суол быраабылатын кэһэн, сэрэҕэ суохтан киһини өлүүгэ тиэрдии иһин.
Суут быһаарбытынан, бу эдэр киһи былырыын сэтинньи ыйга хаайыыттан болдьоҕун иннинэ («УДО»-нан) босхоломмут.
Көҥүлгэ эрдэ тахсыбыт киһи ол үөрүүтүгэр уонна Саҥа дьыллааҕы бырааһынньыктар үүнэн, ахсынньы 31 күнэ үүнэр түүнүгэр испит-аһаабыт. Уонна соннук итирик туруктаах сарсыарда уруулга олорон, куорат устун айаннаан иһэн, полиция массыынатыттан куоппут.
Ол Хабаров уулуссатынан хараҕа тэстэринэн көтүтэн иһэн, Водников уулуссатын 1 №-дээх дьиэтин утарытыгар суолу туораан испит 56 саастаах дьахтары түҥнэри көппүт. Дьахтар эрэйдээх быһылаан миэстэтигэр тыына быстыбыт, оттон итирик суоппар куотар аакка барбыт.
Суут бириигэбэринэн, буруйдаах киһи усулуобунайдык болдьоҕун иннинэ босхоломмута көтүрүллэн, ол хаалбыт болдьоҕо эбиллэн, 5 сылга кытаанах эрэсиимнээх холуонньаҕа көҥүлэ уонна 3 сылга массыына ыытар бырааба быһылынна.
Бириигэбэр сокуоннай күүһүгэр киирэ илик. Бу туһунан СӨ Борокуратууратын пресс-сулууспата иһитиннэрдэ.
This post was published on 10.04.2017 14:40 14:40