Хаҥалас уонна Амма оройуоннара билигин оттооһун былаанын толорууга инники күөҥҥэ сылдьаллар, Бу уулустар 75 %- тан тахса оту бэлэмнээтилэр. От сезонун хаамыытын туһунан дааннайдары Саха сирин тыатын хаһаайыстыбатын миниистирэ Александр Атласов кэпсээтэ, диэн СИА иһитиннэрэр.
Атырдьах ыйын 22 күнүнээҕи туругунан, өрөспүүбүлүкэҕэ 265 тыһыынчаттан тахса гектар ходуһа оттоммут, 270 тыһыынча туонна от бэлэмнэммит, бу былаантан 61 % тэҥнэһэр. Уопсайынан, сүөһү аһылыгын бэлэмнээһиҥҥэ 30-ча тыһыынча киһи уонна 10 тыһыынча тиэхиникэ үлэлээтэ, диэн миниистир кэпсээтэ. Эбии мобильнай биригээдэлэринэн 40 тыһыынча туоннаттан тахса сүөһү аһылыгын бэлэмниир былааннаахтар. Билигин өрөспүүбүлүкэ үрдүнэн 122 мобильнай биригээдэ тэриллэн үлэлиир, тоҕус тыһыынчаттан тахса туоннаны бэлэмнээтилэр (былаантан 20%).
Александр Атласов иһитиннэрбитинэн, от былаанын толорууга Хаҥалас улууһа лидердээн иһэр — былаантан 76%. салгыы Амма улууһа (75%), Мэҥэ- Хаҥалас улууһа (70%). Былааны 60%-тан тахса Нам, Сунтаар, Ньурба, Таатта, Томпо, Уус-Алдан оройуоннара толордулар.
«Бу улуустарга былааны ситиһиилээхтик толортуур буоллахтарына, от үүнүүтэ мөлтөх улуустарыгар кинилэртэн көмөлөһүннэриэхпит. Мантан сиэттэрэн, атын регионнартан от тиэйии былааннаммат», — диэтэ миниистир.
Оттооһуҥҥа уустук быһыы-майгы Дьааҥы, Кэбээйи, Чурапчы уонна Горнай оройуоннарыгар үөскээбитэ бэлиэтэнэр.
