Саха сиригэр ыам ыйын 27 күнүгэр икки ойуур баһаара умуруоруллар — Хаҥалас улууһугар уонна Дьокуускай таһыгар. Уопсай уот сиэбит иэнэ — 194 га. Экология министиэристибэтэ иһитиннэрбитинэн, Ойуур уотун кытта үлэлиир тэрилтэлэр 97 сотрудниктара, 15 техника баһаары кытта охсуһар.
«Баһаар тахсар сэрэҕин сезона өрөспүүбүлүкэҕэ соччо үчүгэйэ суох саҕаланна. Итийдэр итийэн иһэр, сотору кураанах этиҥ кэмэ саҕаланыаҕа. 2021 сыллааҕы балаһыанньа хатыламматыгар үлэлиэхтээхпит, ол сыл ойуурга улахан хоромньту тахсыбыта», – диэн тустаах мунньахха бырабыыталыстыба бастакы вице-премьера Дмитрий Садовников эттэ.
Садовников улуус баһылыктарыгар эрдэттэн сэрэтэр үлэни ыытыыны күүһүрдэллэригэр, рейдэлэри олохтуулларыгар, уот туруутугар түргэнник дьаһал ылалларыгар сорудахтаата.
Сезон саҕаланыаҕыттан Саха сиригэр 17 ойуур уонна 19 ландшафтнай баһаар таҕыста. Элбэх термотуочука Дьааҥы уонна Эбээн-Бытантай улуустарыгар таҕыста. Сүрүн биричиинэ — киһи дьалаҕай сыһыана.
