28 Кулун тутар 28.03
  • -13°
  • $ 92,59
  • 100,27

Хаҥалас улууһугар култуура үлэһиттэрэ сахалыы сон тиктэллэр

14:01, 18 февраля 2022
Текст:
Читайте нас на
Яндекс Новости
ЯДВ

Хаҥалас улууһугар  саха былыргы таҥаһын  сөргүтэн, нэһилиэктэринэн маассабайдык тиктии 2012  сыллаахтан саҕаламмыта. Манна улахан төһүү күүһүнэн  Духуобунас сыла буолбута. Дьон-норуот санаата өрө көтөҕүллүбүтэ, эдэр көлүөнэ ийэ дойдуларыгар бэриниилээх дьоһун дьон буола иитиллэригэр, төрөөбүт култуурабытын дириҥник хорута үөрэтэрбитигэр үтүмэн үлэ барбыта.

Духуобунас  сыллара  Хаҥаласка 2014 сылга ыытыллар ахсыс өрөспүүбүлүкэтээҕи Олоҥхо ыһыаҕар бэлэмнэнии үлэтин курдук ааспыттара. Саха төрүт култууратын үөрэтиигэ, чинчийиигэ улууспут култууратын үлэһиттэрэ араас хабааннаах научнай конференциялары, чинчийэр үлэлэри, саха таҥаһын, ат симэҕин, кыбытыктаах олбохтору тигиигэ, мастан-туостан иһити-хомуоһу, малы-салы оҥорууга наука үлэһиттэрин, норуот маастардарын  көмөтүнэн сүүһүнэн ахсааннаах  семинардары, маастар-кылаастары тэрийэн ыыппыттара.

Ол кэмнэртэн ситимнэнэн, Хаҥаласка ат толору симэҕин үөрэтиигэ уонна тигиигэ, худуоһунньук Михаил Носов хартыынатыгар олоҕуран саха дьоно XVII- XIX үйэтинээҕи  уонна ХХ үйэтинээҕи саха интеллигенциятын сахалыы таҥастарын чинчийэн, сөргүтэн тигиигэ  элбэх үлэ бырайыак быһыытынан тиһигин быспакка үлэлиир. Бу бырайыактары иилээн-саҕалаан, сүбэлээн-амалаан, билиҥҥэ диэри  көмөлөһө сылдьар хотугу-илиҥҥи федеральнай университет доцена, историческай наука кандидата, саха таҥаһын чинчийиигэ, үөрэтиигэ элбэх монографиялар ааптардара, Саха Өрөспүүбүлүкэтин норуотун маастара Светлана Ивановна Петрова буолар.

Быйыл, улууспут култууратын  салайааччыта Фекла Варламова бырайыагынан  култуура үлэһиттэрэ  сахалыы үгэс буолбут кыһыҥҥы сону тиктэргэ соруннулар. Бырайыак  научнай салайааччыта  Светлана Петрова уонна Россия норуотун маастара, иистэнньэҥ Татьяна  Шишигина хамсык кэмигэр араас ситимнэри туһанан, үлэлэрин саҕалаатылар.

Бырайыак үлэтэ икки хайысханан баран иһэр. Үлэ сүнньүнэн сөптөөх дьүөрэлэһэр өҥнөөх таҥастан тупсаҕайдык кыһыҥҥы сон тиктиитэ буолар, иккис хайысхатынан  сон таһынан кэтиллэр  өттүк симэҕин  оһуорун быысыбайа, дьабака бэргэһэтин оһуора. Манна араас оҕуруонан, сабынан, киэргэл тимирдэри туһанан  сон киэргэллэрин оҥороллор.

Бырайыакка ыраах сытар Үөдэй, Улахан-Аан курдук нэһилиэктэр култуураларын үлэһиттэрэ актыыбынай кыттыыны ылыллара кэрэхсэбиллээх.

Ааптар: Галина Семенова, Хаҥалас улууһа

Следите за самым важным и интересным в Telegram-канале и WhatsApp-группе ЯСИА