Хаҥалас улууһун киинигэр, Покровскайга, «Саргы түһүлгэтэ» култуура киинигэр зонатааҕы гражданскай форум буолан ааста.
Манна киин куораттан СӨ Уопсастыбаннай балаатата, гражданскай уопсастыба министиэристибэтэ, НКОлар салайааччылара, уопсастыбаннай сэбиэттэр, түмсүүлэр кыттыыны ыллылар. Суолталаах тэрээһииҥҥэ уопсайа 180 киһи сырытта.
Форум чэрчитинэн ТОС-тары, НКО-лары тэрийиигэ, социальнай бырайыактары оҥорууга юридическай көмө оҥоһулунна.
«Орто дойду пааркатыгар» улуус мунициплитетын баһылыга Гаврил Алексеев «Ил эйгэ» дьахтар уопсастыбаннай сэбиэтигэр эмтэнэ барар ыараханнык ыалдьар оҕолорго анаан анал үп хомуйар «Аһымал дьааһык» күлүүһүн туттарда.
Дьахтар сэбиэтин хамыыһыйата кыбаарталга биирдэ киирбит үбү хомуйан ылыаҕа. Онтон улуустааҕы киин балыыһа салалтатын кытта сүбэлэһэн баран, ыраах киин куораттарга эбэтэр тас дойдуга эмтэнэ барар оҕолор төрөппүттэригэр эбэтэр сокуоннай бэрэстэбиитэлгэ туттарыахтара.
Бастакы харчыны «Аһымал дьааһыкка» гражданскай форум кыттыылаахтара уктулар.
Елена ПОТОЦКАЯ, «Саха сирэ» хаһыат, edersaas.ru
