Намнааҕы «Намкоммунтеплоэнерго» акционернай тэрилтэ (ген. директор Н.В. Игнатьев) ахсыс сылын улуус нэһилиэктэрин киин хочуолунайдарын саҥардар. Онон социальнай, олорор дьиэлэри итиинэн хааччыйан, үлэлиир усулуобуйа биллэрдик тубуста.
Граф Биэрэгэр баар техникум объектарын уонна олорор дьиэлэри ититэр киин хочуолунайа реконструкцияланан итиини биэриини саҕалаата. Тэрилтэ генеральнай директора Н.В. Игнатьев этэринэн, улууска бу бүтэһик хочуолунай саҥардыллыбыт. «НКТЭ» аны Уус Алдан улууһугар маннык хайысхалаах үлэни саҕалаабыт.
Алтынньы 8 күнүгэр Граф Биэрэгэр уларытыллан тутуллубут саҥа киин хочуолунай үлэтин саҕалыыр бэлиэтиир үөрүүлээх түмсүү буолла. Алгысчыт Петр Охлопков аал уоту айах тутта, алгыстаата, бар дьонун арчылаата.
Эҕэрдэ, махтал тыллары улуус баһылыга Юрий Слепцов, улуус депутаттарын Сэбиэтин председателэ Иван Попов, нэһилиэк депутаттарын Сэбиэтин председателэ Евгений Жирков, «НКТЭ» АТ ген. директора Николай Игнатьев. Улуус баһылыга хочуолунайы туппут «КОТЕСС» ХЭТ ген. директорыгар Сергей Колмаковка «Нам улууһун социальнай-экономическай сайдыытыгар кылаатын иһин» Бэлиэни, улуус депутаттарын Сэбиэтин председателэ бу тэрилтэ аварийно-эксплуатационнай сулууспатын начальнигар Иннокентий Левиҥҥэ Бочуотунай грамотаны, тэрилтэлэр салайааччылара тутааччыларга, «НКТЭ» үлэһиттэригэр нэһилиэк уонна Граф Биэрэгинээҕи техникум махтал суруктарын үөрүүлээх быһыыга-майгыга туттардылар.
Бэлиэ күҥҥэ мустубуттары «Ивушка» нууччалыы ырыа ансамбыла сэргэх ырыанан эҕэрдэлээтэ. Сергей Георгиевич (тутааччы) «НКТЭ» АТ салайааччыларыгар өйөбүл-тирэх буолбуттарыгар махтанан уонна тэрилтэ специалистара профессиональнай таһымнара, билиилэрэ үрдүгүн бэлиэтээн, өссө үөрдүк ситиһиини баҕаран туран, «Символическай күлүүһү» Николай Васильевичка туттарда.
Бу кэнниттэн объект аһыллыытын кэрэһэлиир кыһыл лиэнтэни улуус баһылыга Юрий Слепцов, улуус уонна нэһилиэк депутаттарын Сэбиэттэрин председателлэрэ Иван Попов, Евгений Жирков, техникум директора Ньургустан Жирков, «КОТЕСС» ХЭТ ген. директора Сергей Колмаков, «НКТЭ» АТ ген. директора Николай Игнатьев кырыйдылар.
Ааптар: Иннокентий Иванов, https://ulus.media
