Алтынньы 26 күнүгэр «Коммунист» хаһыакка бэчээттэнэн тахсыбыт инбэлииттэр уонна кырдьаҕастар дьиэлэригэр олорор дьон аатыттан суруллубут сурук дьону-сэргэни улаханнык аймаата. Бу сурукка кырдьаҕастары хоргуталларын, концлагерь курдук усулуобуйа олохтоммутун туһунан этиллибит этэ. СИА бу сурук ааптарын Людмила Степанованы кытта кэпсэттэ.
Людмила Степанова интэрнээккэ киирбитэ 4 ый буолбут. Эдэригэр уопсастыбаннай кэрэспэдьиэнинэн үлэлээбит. Суруналыыһы кытта кэпсэтэригэр кини быһыыны-майгы ситэри билбэккэ эрэ ордук иэйиитинэн салайтарарын туһунан билиннэ. «Мин эрэдэктэрим хойгур тойугу бэчээттээбэппин. Биһигини таһааран ытыалаан кээһиэхтэрэ диирэ», — диэн кини этэр.
Маннык ынырык ис хоһоонноох суругу суруйарга туох төрүөт буолбутун таайар уустук. Баҕар, ким эрэ сакааһа буолуон эмиэ сөп.
«Мин хоско бииргэ олорор дьахтарбын кытта майгыбытынан сөп түбэспэтэхпит. Тоҕо диэтэххэ, кини куруук барытын сирэр уонна наар куһаҕаны эрэ кэпсии, биир кэм сулана сылдьар. Кини куорат бары интэрнээттэригэр барытыгар олоро сылдьыбыта. Чиэһинэйдик эттэххэ, кини бу манныгы суруйарга этии киллэрбитэ. Ол кэнниттэн көлбөрүтүнэн кээспитэ. Суох, мин бэйэм буруйбун атын киһиэхэ соҥнуур санаам суох. Бу – мин айбыт үлэм», — диир Степанова.
Людмила Григорьевна өйдөөн-дьүүллээн аахпакка эрэ эрэдээксийэҕэ биэрбитин кэмсинэр.
«Манна тугу сөбүлээбэккин диэн миигиттэн куруук ыйыталлар. Ордук сайын теплица баар эрдэҕинэ, олус үчүгэй этэ. Мин оҕуруоту олордууга, көрүүгэ-истиигэ көмөлөһөрүм. Миэхэ үлэ наада. Сайынын дьэдьэннээбиппит, отоннообуппут», — диир кини.
Тэрилтэ дириэктэрэ Анна Слепцова бу тахсыбыт быһыыны-майгыны өйдүүр. «Биһиэхэ 151 киһи олорор, кинилэр орто саастара — 74-80. Мин социальнай харалта сулууспатыгар үлэлээбит 33 сылым тухары бу аан бастакы түбэлтэ. Людмила Григорьевна биһиэхэ соторутааҕыта кэлбитэ, саҥа үөрэнэ сатыыр. Баҕар, ол да иһин маннык түбэлтэ тахсыбыт буолуон сөп», — диир кини.
СИА кырдьаҕастар олорор усулуобуйаларын билистэ. Кырдьык, аһыыр астара элбэҕэ суох. Ол эрээри хоргуйууттан чахчы өлбөккүн. Сарсыардааҥҥы, күнүскү, күн аҥаарынааҕы, киэһээҥҥи аһылык. Хааһы да, миин да, салаат да баар. Барыта СанПин ирдэбилинэн астанар.
Кырдьаҕастар хоско үһүө буолан олороллор. Хос барыта туалеттаах, душтаах. Бильярд, саахымат. Барыта дьиэҕэ курдук.
Эмтиир физкультура, уйулҕа сынньанар хосторо бааллар.
Билигин бу сурукка олоҕуран үлэ, социальнай сайдыы министиэристибэтэ бэрэбиэркэлиир, анал хамыыһыйа тэриллибит.
Куһаҕан үчүгэйэ суох буолбат. Бу сурук социальнай тэрилтэҕэ болҕомтону тарта. Дьон кырдьаҕастары өрөбүллэргэ дьиэлэригэр ыларга, аһынан, таҥаһынан көмөлөһөргө этии киллэрбиттэр.
