ЛДПР дьокутааттара уонна партия лидерэ Леонид Слуцкай баһылыктаах сенатордар дьахтар декрет уоппускатын кэмигэр хат буолар түгэнигэр— хат буолууга, төрөөһүҥҥэ, ону тэҥэ оҕо көрүүтүгэр — икки босуобуйаны тэҥҥэ төлүүр кыаҕы көрөр сокуон барылын Госдуумаҕа киллэрдилэр. Докумуон дуума электроннай базатыгар баар, диэн иһитиннэрэр ТАСС.
Сокуон барылынан «О государственных пособиях гражданам, имеющим детей» сокуон 13 ыстатыйатыгар уонна «Об обязательном социальном страховании на случай временной нетрудоспособности и в связи с материнством » сокуон 10 ыстатыйатыгар уларытыылары киллэрэргэ этии киллэриллэр. Ол курдук оҕо көрөн олорор ийэ хат буоллаҕына уонна төрөөтөҕүнэ — икки босуобуйаҕа тэҥ быраабы тутара этиллэр.
Билиҥҥи сокуон быһыытынан, дьахтар оҕо көрөр уоппускатын кэмигэр хат буолан хааллаҕына, икки босуобуйаттан биирин талан ылар быраап бэриллэр. Быраабыла курдук, төрүөҕүнэн төлөбүр талыллар, бу төлөбүр орто хамнас 100% кээмэйинэн ааҕыллар. Бу түбэлтэҕэ бастакы оҕону көрүү уоппуската тохтообутунан ааҕыллар, туһааннаах ыйдааҕы босуобуйа аны төлөммөт.
Быһаарыы суругар бэлиэтэнэринэн, этиллэр дьаһал ыаллар уустук кэмҥэ туруктаах дохуоттарын тутуһалларыгар көмөлөһүөхтэрэ, үп-харчы ноҕуруускатын таһымын намтатыаҕа уонна социальнай көмүскэл таһымын үрдэтиэҕэ.
This post was published on 15.01.2026 10:03 10:03