2026 сылга ититии, уу, электроэнергия, гааһынан хааччыйыы, канализация уонна бөҕү таһыы киирэр ОДЬКХ өҥөтүгэр тарыыптар үрдүөхтэрэ. Индексация, былаанынан, 9,9% буолуоҕа, диэн алтынньы 30 күнүгэр Госдуума депутата, ГД тутууга уонна ОДЬКХ кэмитиэтин бэрэссэдээтэлин бастакы солбуйааччы Роман Лябихов «Известияҕа» эттэ.
«Кэлэр сылга бюджет былааныгар тарыыптар үрдээһиннэрэ 9,9%. Эмиэ бу боростуой гражданнарга бастатан туран охсуоҕа», — диэн экономическай сайдыы министиэристибэтин борогунуоһугар сигэнэн Лябихов кэпсээтэ.
Депутат хомунаалынай өҥө тарыыптара дьиэ кэргэн дохуотун 10%- нын куоһарыа суохтаах дии. Кини этэринэн, икки оҕолоох көннөрү орто дьиэ кэргэн туһунан толкуйдуохха наада, дохуота хомунаалынай тарыыптар уонна сыана тэтиминэн улааппат.
Экономическай сайдыы министиэристибэтин былаанынан, индексация борогунуос инфляцияттан көрөн үөскүүр.
Маны таһынан хомунаалынай хаһаайыстыба уонна хамсаабат баайга-дуолга салайыы эйгэтигэр мөккүөрдэри быраапка өйөөһүн хайысхатын хааччыйар «Яковлев и партнеры» юридическай бөлөх салайааччыта Сергей Сергеев 2026 сылга хапытаалынай өрөмүөн, консьерж уонна домофон сыаната үрдүүрүн этэр.
«Хомунаалынай тэриллиилэргэ киирбэт өҥө сыаната үрдүүр эрээри, автоматтаан буолбатах. Бу төлөбүрдэр «гражданнар төлөбүрдэрин уларыйыы индексынан» сүрүннэммэттэр, онон үрдээһин бас билээччилэр уопсай мунньахтарын быһаарыыларыттан (тутан-хабан, өрөмүөн өттүнэн) эбэтэр регионнааҕы оператордар хапытаалга бигэргэтиллибит усунуостарыттан тутулуктаах. Үксүгэр бу ыстатыйаларга үрдээһин инфляция иһигэр эбэтэр арыый үрдүк тахсар. Управляющай тэрилтэ мунньаҕы ыыппакка эрэ төлөбүрү биир өрүттээхтик улаатыннарар кыаҕа суох», — диэтэ Сергеев.
This post was published on 30.10.2025 12:01 12:01