Бэрдьигэстээххэ физкультураны, спорду аргыс оҥостон, чөл, чэгиэн олоҕу көҕүлүүр, араас сылларга өрөспүүбүлүкэ аатын араас күрэхтэһиилэргэ чиэстээхтик көмүскээбит Дьокуускайга олорор спорт бэтэрээннэрэ (бэрэссэдээтэл Гаврил Сивцев) улуус киинигэр кэлэн, бэйэлэрин үөлээннээхтэрин кытары ирэ-хоро кэпсэтэн, уруккуну-хойуккуну санаһан, ыалдьыттаан бардылар.
Спорт бэтэрээннэрэ буулдьанан ытыыга, остуол тенниһигэр табаарыстыы көрсүүгэ күөн көрүстүлэр. Бастакы көрүҥҥэ олохтоохтор иннилэрин биэрбэтилэр.
Горнайдар бэргэн ытааччы буолалларын итэҕэтиилээхтик бигэргэттилэр. Остуол тенниһигэр Дьокуускайтан өрөспүүбүлүкэ чемпионнарын, Россия призердарын оонньуута туспа маастар-кылаас кэриэтэ буолла. Ол курдук, кинилэр эрэллээх кыайыыны ситиспиттэрэ, биһиги спортсменнарбытыгар улахан үөрэх буолла.
Саастаах дьоҥҥо анаан Маргарита Куличкина сөпкө тыыныы сэрээккэтин көрдөрбүтүн олус сэҥээрдилэр.
Түмүккэ, ыалдьыттарбыт биһиги киэн туттар спортсмеммытыгар Радомир Сидоровка «СӨ физическэй култууратын уонна спордун бэтэрээнэ» үрдүк бэлиэни туттарбыттарын мустубут дьон дохсун ытыс тыаһынан эрҕэрдэлээтилэр.
Инникитин бииргэ үлэлэһэргэ этии киирбитин бары өйөөтүлэр, суруйда Вячеслав Алексеев @silatrudagorny
This post was published on 17.04.2025 18:17 18:17