Уһук Илиҥҥи босхо биир гектар туһунан сир ахсын күннэтэ саамай элбэх кэпсэтии, дьүүллэһии буолар. Манна киһи мунаахсыйара элбэх. Мөккүөрдээх да түгэннэр аҕыйаҕа суохтар.
Горнайдааҕы «Үлэ күүһэ» хаһыат кылаабынай редактора Василий Алексеев улуус дьаһалтатын көрдөһүүтүнэн, «Уһук Илиҥҥи биир гектар» диэн ааттаах брошюраны 50 ыйытыыга хоруй быһыытынан бэчээттээн таһаартарда.
Автор «Үлэ күүһүгэр», өрөспүүбүлүкэ хаһыаттарыгар бэчээттэммиттэртэн, интернет ситимиттэн туһаммыт. Киниэхэ «Росреестр» Саха сиринээҕи управлениетын сүрүннүүр специалиһа Никифор Павлов, сиргэ, баайга-дуолга сыһыаннаһыыга улуустааҕы управление салайааччыта Маргарита Чемезова, ойуур хаһаайыстыбатын начаалынньыга Александр Текеянов көмөлөспүттэр.
Билигин сири туһана да сылдьар дьон докумуоннаталларыгар, наадалаах сүбэлэр киирбиттэр, мунаахсыйар боппуруостары чуолкайдааһыннар бааллара кимиэхэ баҕарар туһалаах буолуо.
This post was published on 19.02.2016 15:16 15:16