Горнай улууһун П.Д. Аввакумов аатынан киин библиотека сэбиэдиссэйэ, уопсастыбаннай сэбиэт бэрэссэдээтэлэ, бырайыак ааптара Лена Саввинова байыаннай хомуурга ыҥырыллыбыт биир дойдулаахтарбытыгар ыытарга анаан алгыстаах хоһооннордоох блокнот-хомуруунньугу алтынньы ый 26 күнүгэр туттарда.
Төрөөбүт тыллаах киһи ийэ куттаах, бигэ тирэхтээх. Горнай улууһун П. Д. Аввакумов аатынан Киин библиотеката өрөспүүбүлүкэ айар дьонугар «САХА БООТУРДАРЫГАР КӨМӨБҮТ — ИЙЭ ТЫЛБЫТ АЛГЫҺА» ыҥырыы биллэрбитэ.
Ыҥырыыга Горнай, Абый, Мэҥэ Хаҥалас, Сунтаар, Уус Алдан, Бүлүү, Амма, Нам, Таатта, Кэбээйи улуустарыттан уонна Дьокуускай куораттан кыттыстылар.
Аҕа дойдубут көмүскэлигэр атаарбыт саха хорсун уолаттарбытыгар күүс-күдэх биэрэр, модун санааны саҕар алгыс тыллары бар дьоммут күн аайы ыыталлар. Айымньылар П. Д. Аввакумов аатынан Киин библиотека социальнай ситимигэр тутатына тахсыбыттара: телеграм (https://t.me/berlib22 ), Вконтакте (https://vk.com/gornylibrary).
«Офсет» ХЭТ генеральнай дириэктэрэ Скобелева Дария Николаевна спонсордаан, алгыс хоһооннор хомуурунньук-блокнота буолан оҥоһуллан таҕыста. Тираһа 500 экземпляр. Блокнокка сыһыары тутарга «Азбука» ХЭТ генеральнай дириэктэрэ Семенова Нина Васильевна 500 устуука харандаас биэрдэ.
Бырайыагы өйөөбүт спонсордарбытыгар, кыттыбыт айар талааннаах ааптардарга махтанабыт, диэн СИА-ҕа суруйдулар Горнай улууһун П. Д. Аввакумов аатынан киин библиотекатын үлэһиттэрэ.
