Горнай улууһун түөлбэлэрэ биир сыаллаах үлэлииллэр

Өрөбүллэргэ Бэрдьигэстээх нэһилиэгин ТОС-тара Мытаах нэһилиэгэр уопут атастаһаллар. «Сардаҥа», «Эйэ», «Үрдэл» түөлбэлэр кыттыыны ыллылар.

Бөлөҕү Бэрдьигэстээх нэһилиэгин баһылыгын солбуйааччы, түөлбэлэр өрөспүүбүлүкэтээҕи ассоциацияларын салайааччыта Ксения Васильева салайда.

Мытаахха «Сардаҥа» түөлбэ салайааччыта Любовь Мордовская, «Эйэ» түөлбэ салайааччыта Жанна Парфенова, «Үрдэл» түөлбэ салайааччыта Светлана Лю-Фа үлэлэрин уопутун кэпсээтилэр.

Бэрдьигэстээх нэһилиэгин уопсастыбаннаһын «Сарыал» сүрүннүүр сэбиэтин бэрэссэдээтэлэ, «Күбэйэ» туойунан оҥоруу мастарыскыайын салайааччыта Майаана Моруот туойтан оҥорууга маастар-кылаас ыытта. Бэрдьигэстээх нэһилиэһин дьаһалтатын исписэлииһэ Марина Николаева ыаҕыйаны тигиигэ, киэргэл уктар иһит оҥорууга үөрэттэ.

Түөлбэлэр хамсааһыннарын сайыннарыыга бииргэ үлэлэһиигэ кэпсэтиилэр ыытылыннылар, сүдү дьоммут Семен уонна Софрон Даниловтар музейдарын, Афанасий Осипов хартыыналарын галереятын сөҕө-махтайа көрдүлэр.

Ааптар: Айталина Санникова