Быйыл Горнай оройуонун Орто-Сурт нэһилиэгэр киин ититиигэ Юбилейнай уонна Лесная уулуссаларга 25 олорор дьиэ холбонуоҕа. Бу туһунан СИА-ҕа регион ОДьКХ уонна энергетика министиэристибэтэ иһитиннэрдэ. Санатан эттэххэ, муус устар 26 күнүгэр өрөспүүбүлүкэ баһылыгын кытары «быһаччы линияҕа» тыа сирин олохтоохторо олорор дьиэлэри ититии туһунан эрийэн тиийбиттэрэ.
Быйыл, Саха сирин ОДьКХ уонна энергетикаҕа министиэристибэтэ иһитиннэрбитинэн, «СӨ ОДьКХ» ГУП бырагыраама чэрчитинэн «квартальнай» хочуолунайтан 1700 погоннай миэтэрэ иэннээх ититэр ситимнэр тутуллуохтара.
«Сыл аайы киин ититиигэ 1100-1200 кэриҥэ олорор дьиэлэри холбуубут. Ол курдук, 2020 сылга өрөспүүбүлүкэ үрдүнэн барыта 1149, 2021 сылга – 1207 чааһынай дьиэлэр холбоммуттара. Быйылгы сылга олорор дьиэлэри киин ититии ситимигэр холбооһун өттүгэр эмиэ итинник үлэни ыытар былааннаахпыт», — диэн Саха сирин ОДьКХ уонна энергетикатын миниистирэ Вячеслав Емельянов иһитиннэрдэ.
