Горнай улууһун Одунутугар сылын аайы чааһынай, кэтэх хаһаайыстыбалаах дьон хороҕор муостааҕы дэлэтэр туһуттан саҥа хотоннору тутан дьэндэтэллэр. Быйылгы дьылга ИП Изабелла Афанасьева – 60, ИП Николай Федоров – 11 уонна Лука Харитонов аатынан агроскуола кэпэрэтиибэ – 20 ынах сүөһү турар хотонун үлэҕэ киллэрэргэ бэлэмнэр.
Ол курдук, ааспыт сылга нэhилиэккэ ЛПХ Мотрена Семенова – 10, ИП Алексей Афанасьев – 15 ынах сүөһү турар хотонун тутан, ньир бааччы кыстаатылар.
Оскуола салалтатын үлэтин бэлиэтиэҕи баҕарыллар. Кинилэр урут тутуллубут нэhилиэк эргэ хотонун ылан, сөргүтүү үлэтин оҥорон, кыстыкка бэлэмнэнэллэр. Хаһаайыстыбалаах дьон үлэҕэ-хамнаска табыгастаах усулуобуйаны тэринэн, тутуу саҥа матырыйаалларын туһанар буолбуттара кэрэхсэбиллээх.
Сэндвич панелынан тупсаҕай көстүүлээх хотон элбээн иһэрэ киһини сэргэхситэр уонна маннык саҥа хотон тутуута, нэһилиэккэ тыа хаһаайыстыбатын сайдыытыгар үлэ бара турарын көрдөрөр.
Алена Васильева, Үлэ күүһэ
