«Арыгыта суох Арктика» конгресс кыттыылаахтара, уопсастыбанньыктар уонна чөл олоҕу батыһааччылар уһулуччулаах историк, уопсастыбаннай деятель, историческай наука доктора, Саха сиригэр чөл олох хамсааһынын саҕалаабыт Георгий Башарин пааматынньыгар сибэкки дьөрбөтүн уурдулар.
-Георгий Прокопьевич олоҕун тухары арыгы да испэтэҕэ, табах да таппатаҕа, чөл олоҕу тарҕатааччынан биллибитэ. Ол иһин, конгресс делегаттара киниэхэ сүгүрүйэ кэллибит, – диэн Георгий Башарин уола, м.н.д, профессор, Медицина институтун анатомияҕа кафедратын сэбиэдиссэйэ, чөл олох аан дойдутааҕы академиятын академига уонна вице-президенэ Карл Башарин иһитиннэрдэ.
Пааматынньыкка сибэкки ууруу кэмигэр «ЗОЖ» уопсастыбаннай фонда дириэктэрэ Елена Щудря тыл эттэ. Управление салайааччыта Матвей Лыткин:
-Биһиги инникибит кэскиллээх буоларын туһугар уруккуну умнуо суохтаахпыт. Георгий Прокопьевич дьыалатын салҕаан, өрөспүүбүлүкэбит, бүтүн Арассыыйа күүстээх, сайдыылаах дойдунан буоларын туһугар кыһаллыахтаахпыт, – диэн эдэр ыччаты чөл олоҕу тутуһарга ыҥырда.