Россия хотугу оройуоннарыгар өр үлэлээбитин иһин «Уһук Хотугу сир үлэтин бэтэрээнэ» ааты иҥэрэргэ этии киллэрдилэр. Саҥа статуһу тэрийии көҕүлээһининэн Госдуума гражданскай уопсастыбаны сайыннарыыга, уопсастыбаннай уонна итэҕэл түмсүүлэрин боппуруостарыгар кэмитиэтин баһылыга, «Сиэрдээх Россия» фракция баһылыгын бастакы солбуйааччы Яна Лантратова буолла, ол туһунан ТАСС суруйар.
«Маннык бэтэрээннэргэ үлэ бэтэрээннэригэр, олорор регионуттан тутулуга суох, олохтоммут чэпчэтиилэр испииһэктэрэ барыта баар буолуоҕа. Бу ааты биэриини Уһук Хотугу сир оройуоннарыгар 35 сылтан итэҕэһэ суох үлэ ыстаастаах эр дьоҥҥо, оттон дьахталларга 30 сылтан итэҕэһэ суох. Наҕараадалары, ураты үтүөлэрин бигэргэтии ирдэбилэ суох, олохтуохха наада», — диэн чуолкайдаата Лантратова.
«Уһук Хоту дойду үлэтин бэтэрээнэ» ааты олохтуурга этии суруга Россия үлэ уонна социальнай көмүскэл миниистиригэр Антон Котяковка ыытылынна.
Депутат билиҥҥи сокуонунан, «Үлэ бэтэрээнэ» аат ыстаас дьахталларга 20 сылтан итэҕэһэ суох, оттон эр дьоҥҥо 25 сылтан итэҕэһэ суох, үлэ үрдүк үтүөтэ баар буоллаҕына, бэриллэр диэн бэлиэтээтэ. Бу аат хаһаайыттарыгар биэнсийэлэр уонна босуобуйалар, ыйдааҕы харчынан төлөбүрдэр, дьиэ биэрии, дьиэ-уот хомунаалынай өҥө төлөбүрүн ороскуотун компенсациялааһын, ону тэҥэ медицинскэй көмө, ол иһигэр тиис протезтааһын, кэккэ социальнай өйөбүл дьаһаллара көрүллэр.
Ону таһынан сорох регионнарга регионнааҕы таһымнаах үлэ бэтэрээнин аатын иҥэриэххэ сөп. Ол эрээри, депутат тоһоҕолоон бэлиэтээбитинэн, Российскай Федерация атын субъегар көһөн кэллэҕинэ гражданнар сөптөөх чэпчэтиилэргэ уонна социальнай өйөбүл дьаһалларыгар бырааптарын сүтэрэллэр. «Манан сибээстээн, Уһук Хотугу сир үлэһиттэрин үлэтин сиэрэ суох сыаналааһынтан дьиксинэллэрин биллэрэр гражданнар этиилэрэ миэхэ тиһигин быспакка киирэллэр», — диэн тоһоҕолоон бэлиэтээтэ Лантратова.
