Российскай Федерация Федеральнай Мунньаҕын Судаарыстыбаннай Думатын депутата, бюджет уонна нолуок кэмитиэтин чилиэнэ Галина Данчикова Саха сирин бастакы президенэ Михаил Николаев кэриэһигэр аналлаах пуорум суолтатын бэлиэтээтэ.
Кини этэринэн, пуорум кылгас кэм иһигэр араас эйгэ эдэр исписэлиистэрэ өрөспүүбүлүкэ сайдыытыгар тирээн турар суолталаах боппуруостарын дьүүллэһэр, практическай быһаарыылары туруорар суолталаах былаһааккаларын быһыытынан көрдөрдө.
“Кини сүрүн сыаннаһа стратегическай соруктары дьүүллэһэргэ эрэ буолбакка, регион сайдыытыгар дьиҥнээх быһаарыылары туруорарга бэлэм көхтөөх, идэҕэ бэлэмнээх саҥа көлүөнэ бэрэстэбиитэллэрин түмэр», — диэн депутат тоһоҕолоон бэлиэтээтэ.
Галина Данчикова пуорум тиэмэлэрэа сыл аайы бириэмэ тирээн турар кыһалҕаларыгар эппиэттииллэрин бэлиэтээтэ. Быйыл муниципальнай тэриллиилэр экономическай туруктаах буолууларын хааччыйыыга болҕомто ууруллар: территорияны сайыннарыыга инвестиция, тыа хаһаайыстыбатын модернизациялааһын уонна туризм.
«Маннык дискуссиялар былаас органнарын үлэтигэр, ол иһигэр бюджет уонна нолуок бэлиитикэтин оҥорууга көмөлөһөр этиилэри киллэрэллэр», — диэтэ.
Парламентарий ыччат көҕүлээһиннэрин судаарыстыбаннай таһымҥа өйөөһүн уонна кинилэри өрөспүүбүлүкэ дьаһалларын тиһигэр киллэрии, Михаил Николаев кууруһун утумнаахтык тутуһар эрэ буолбакка, өрөспүүбүлүкэ кадровай уонна интеллектуальнай кыаҕын үөскэтэргэ кыаҕы биэрэрин тоһоҕолоон бэлиэтээтэ.
Санатан эттэххэ, Николаевскай пуорум үһүс төгүлүн ыытыллар. Быйыл алтынньы 1-3 күннэригэр буолуоҕа, оттон кини сүрүн тиэмэтэ — инвестиция, тыа хаһаайыстыбатын уонна туризмы сайыннарыы нөҥүө муниципалитеттар экономическай туруктаах буолууларын хааччыйыы.
Пуоруму тэрийээччинэн Саха Сирин Судаарыстыбаннай Мунньаҕар (Ил Түмэн) Ыччат парламена буолар. Тэрээһин Судаарыстыбаннай Мунньах (Ил Түмэн) уонна өрөспүүбүлүкэ бырабыыталыстыбатын, ону тэҥэ партнердар: Иркутскайдааҕы ньиэп хампаанньатын, Саха сирин кэскиллээх көлүөнэлэрин тус сыаллаах пуондатын, “Саха Сирин Тимир суоллара” Акционернай хампаанньа, «Якутия» авиахампаанньа, «Таас Мас» ХЭО, «Сахаэнерго» АК, СӨ Баһылыгын иһинэн инновационнай менеджмент Үрдүкү оскуолатын уонна Саха Сирин Ыччат кадровай киинин өйөбүллэринэн ыытыллар.
This post was published on 03.10.2025 14:22 14:22