Дьокуускай куоракка Ленскай уулуссаҕа кыра күүрүүлээх (дабылыанньалаах) гаас турбатын өрөмүөннээһин үлэтэ түмүктэннэ. 2006 сыллаах эргэ гаас ситимин саҥардан биэрдилэр. Уопсайа 190 миэтэрэ уһуннаах сир аннынан уонна сир үрдүнэн ааһар турба тардылынна. Ол туһунан Ил Түмэн дьокутаата, «Сахатранснефтегаз» АУо генеральнай дириэктирэ Алексей Колодезников бэйэтин Телеграм-ханаалыгар иһитиннэрэр, Саха парламент саайт.
Дьиэни сылытарга уонна аһы-үөлү буһарарга бу гаас утаҕар түөрт чааһынай дьиэ, түөрт элбэх кыбартыыралаах дьиэ, икки хочуолунай уонна алта гараас боксата холбонон олороллор.
Кэлэр кыстыкка бэлэмнэнии, гаас ситимин саҥардыы үлэтэ күөх төлөнү туһанааччыга эрэллээхтик тиэрдии чэрчитинэн уонна өрөспүүбүлүкэ киин куоратын суолун-ииһин оҥоруу үлэтин кытта алтыһыннаран оҥоһулунна.
Оттон Хаҥалас улууһун Покровскай куоратын Звероферма түөлбэтигэр үрдүк күүрүүлээх гаас ситимин саҥардыы уонна тутуу үлэтэ ыйыллыбыт болдьох иннинэ эрдэ түмүктэннэ. Гааһы үллэрэр ситим управлениетын үлэһиттэрэ 1969 с. оҥоһуллубут эргэ турбаны бүүс бүтүннүү көтүрэн, 828 миэтэрэ уһуннаах үрдүк күүрүүлээх гаас саҥа турбатын сыбааркалаан, таҥан биэрдилэр.
Гаас турбата Звероферматтан Покровскай туһаайыытынан тардылынна, саҥа турба гааһы үллэрэр ситим кыамтатын улаатыннарда уонна гааһынан хааччыллыы эрэллээх буоларын хааччыйда.
