Футболга Россия сүүмэрдэммит хамаандата сербтарга 0:5 ахсаанынан хоттордо. Нациялар Лигаларын бөлөҕүнэн түмүктүүр матчтара ыытылынна. Онон турнир үрдүкү дивизионыгар киирбэтилэр.
Неманья Радоньич (10-я минута), Лука Йович (25, 45), Душан Влахович (41) уонна Филип Младенович (64) мээчиги киллэрдилэр. Россия хамаандата алта матч тухары биир да кыайыыны суруммата. Эрдэ биэс көрсүһүүгэ үстэ тэҥнэспитэ, иккитэ хотторбута.
Россия хамаандата 8 очукуолаах уонна турнир таблицатыгар В лигаҕа 3 бөлөххө иккис буоллулар, онон үрдүкү дивизиоҥҥа — А лигаҕа — хапсыбатылар. Бөлөххө кыайыылааҕынан таҕыста уонна А лигаҕа киирдэ Венгрия хамаандата (11 очков), үһүскэ сербтар фиништаатылар (6), төрдүскэ — туроктар (6). Турция хамаандата С лигаҕа тахсыбыта.
Россия хамаандатын көмүскээччитэ Юрий Жирков 100-с матча буолар национальнай хамаанда састаабыгар оонньообута. 37 саастаах футболист онон бэһис миэстэлээх. Саамай элбэх киирсиини Василий Березуцкий (101), Виктор Онопко (109), Игорь Акинфеев (111) уонна Сергей Игнашевич (127) аһардылар.
Хамаанда иккис төгүлүн үрдүкү дивизиоҥҥа киирбэтэ. 2018 сыллаахха күһүн буолбут күрэхтэһиигэ бэйэлэрин бөлөхтөрүгэр эмиэ иккис миэстэ буолбуттара. Онно Швеция хамаандатыгар хотторбуттара.
This post was published on 19.11.2020 14:01 14:01