21 Тохсунньу 21.01
  • -48°
  • $ 73,82
  • 83,32

Филиппины бэрэстэбиитэлэ кэллэ, Россияттан бэрэбиэркэ иһэр

16:38, 16 февраля 2017
Текст:

Бу дьыл олунньу 14 күнүгэр «Филиппинканы хаайан олорбут кэргэнниилэргэ дьыала тэрилиннэ» диэн матырыйаалбыт бэчээттэммитэ. Салгыы бу дьыаланан туох буола турарын edersaas.ru билиһиннэрэн суруйдулар. 


Ол иннинэ дьыала ис хоһоонун кылгастык санаттахха, кэргэннии Кристина уонна Александр Леваднайдарга РФ Холуобунай кодексатын 127-с ыст. 3-с чааһынан, ол эбэтэр, киһиэхэ ыарахан эчэйиини оҥорон туран, көҥүлү быһыы бэлиэтэ баарынан холуобунай дьыала тэриллибитэ. Бу «Чистый дом» клининговай хампаанньа хотуна уонна кини эрэ — Дьокуускай куорат полициятын начальнигын солбуйааччы — биир дьиэ кыбартыыратыгар Филиппиныттан төрүттээх, дьиэ хомуйааччынан кинилэргэ үлэлии сылдьыбыт дьахтары кырбаан баран, күүс өттүнэн хоско хаайыыга уорбаланаллар. Олунньу 12 күнүгэр филиппинка маҥнайгы этээс түннүгүттэн ыстанан куотан, ыарахан эчэйиилэри ылан, билигин балыыһаҕа эпэрээссийэлэнэн сытар.

Бу быһылаан тула атыыр айдаан тахсыбыта. Борокуратуура бэйэтин бэрэбиэркэтин саҕалаабыта. «Чистый дом» хампаанньа үлэ уонна миграция туһунан сокуоннары кэспитин-суоҕун. Ити үөһэ эппитим курдук, силиэстийэ уорганнара холуобунай дьыаланы тэрийбиттэрэ. СӨ Ис дьыалаҕа министиэристибэтэ сулууспанан бэрэбиэркэ саҕалаабыта итиэннэ А.Леваднай ити буруйу оҥорууга сыһыаннааҕа дакаастанар түмүгэр, ис дьыала уорганнарыттан ууратыах буолан эрэннэрбитэ.

Онтон бэҕэһээ, олунньу 15 күнүгэр, филиппинка Ракель Фаброһу быыһаабыт саха киһитэ Афанасий Алексеев «Якутск.ру» интернет-сайт нөҥүө РФ ис дьыалаҕа миниистирэ Владимир Колокольцевка видеонан ыҥырыы оҥорбута — бу дьыалаҕа полиция үрдүк дуоһунастаах салайааччыта уорбаланарынан уонна силиэстийэ хаамыытыгар араас харгыстары соруйан үөскэтиэхтэрин сөбүнэн, дьыала хаамыытын тус хонтуруолугар ыларыгар.

Бүгүн, олунньу 16 күнүгэр, Филиппины посольствотын бэрэстэбиитэлэ көтөн кэлэн, тута балыыһаҕа биир дойдулааҕын көрсө барда.

Маны тэҥэ, СӨ ИДьМ-тын пресс-сулууспата иһитиннэрбитинэн, Россия ИДьМ-тын Бэйэҕэ куттал суох буолуутун кылаабынай управлениетын хамыыһыйата кэлэр буолла. Хамыыһыйа бэрэбиэркэтин ИДьМ миниистирин солбуйааччы бэйэтэ салайыаҕа.

0
0
21 января 21.01
  • -48°
  • $ 73,82
  • 83,32