Бу сыл ыам ыйын 18 күнүгэр Үөһээ Халыма суута Орто Халыма улууһун Байды нэһилиэгин олохтооҕун Аркадий Иннокентьевич Еремеевы РФ Холуобунай кодексын 261 ыстатыйатын 1 чааһынан буруйдааҕынан ааҕан, 51 мөл. солк. суумалаах хоромньуну таһаарбыт диэн, толуйарга быһаарда. Силиэстийэ барыыта инникиттэн даҕаны саарбахтааһыннааҕын үөрэтэн көрөн баран уонна кэнники кэмҥэ дьон олоҕун огдолутар дьыалалар элбээн иһэллэринэн, киэҥ эйгэҕэ таһааран көмүскүүргэ сананныбыт.
Аркадий Еремеев 1961 сыллаахха тохсунньу 19 күнүгэр Налимскай сэлиэнньэтигэр Орто Халыма оройуонугар төрөөбүт. «Үлэ бэтэрээнэ», «СӨ тыатын хаһаайыстыбатын туйгуна», «Орто Халыма улууһун сайдыытыгар өҥөтүн иһин» бэлиэ хаһаайына, элбэх Бочуот грамоталарынан, махтал суруктарынан бэлиэтэммит киһи. Кэргэннээх, икки кыыстаах, үс сиэннээх. Аркадий Иннокентьевич табаҕы тарпат, арыгыны испэт, чөл олоҕу тутуһар, нэһилиэгэр холобурга сылдьар туруу үлэһит киһинэн биллэр.
Баһаар саҕаланыыта
2022 сыл от ыйын 27 күнүгэр тыа баһаара турбут. Ол күн Аркадий Еремеев уонна Николай Лаптев «Беларус» тыраахтарынан каракат вездеходу, малларын тиэнэн оттуур сирдэригэр айаннаабыттар. Отчуттар сирдэригэр тиийэн, малларын сүөкэнэ сылдьан буруо тахсарын көрбүттэр. Буруо кинилэр айаннаан кэлбит сирдэринэн буолбакка, тыа үрдүнэн тахсар эбит. Каракаты тыраахтартан арааран, буруо тахсар сиригэр барбыттар.
Сирэ тиэхиньикэ сылдьарыгар уустук буолан тыраахтардарын аара хаалларан, буруо хоту сатыы барбыттар. Сотору буолан баран, буруо айаннаан кэлбит сирдэрин туһаайыытынан баран эрэрин көрөннөр, төттөрү каракаты хаалларбыт сирдэригэр тиийбиттэр. Каракаты ылан баһаар хоту барбыттар. Ол иһэн тиэхиньикэлэрэ алдьанан, сатыылаабыттар. Тиийбиттэрэ, уот суолга 15-20 миэтэрэ чугаһаабыт. Төттөрү-таары сылдьалларыгар чаастан ордук бириэмэ ааспыт.
Олохтоох дьаһалтаҕа уонна Орто Халыма лесхоһугар баһаар турбутун биллэрбиттэр. Икки чаас курдугунан, «Сокол» вездеходунан Орто Халыма баһаарынай чааһын үлэһиттэрэ И.Н. Слепцов,
Г.Д. Белоногов уонна дознаватель С.В. Оконешников, онтон Ю.К. Третьяков салайааччылаах нэһилиэк баһаарынай хамаандата кэлбиттэр.
Буруй эрэ моттойоҕо
Ол түүн, от ыйын 28 күнүгэр 2022 сыл дознаватель С.В. Оконешников Еремеевтэн уонна Лаптевтан үүтээҥҥэ олорон быһаарыы сурук ылбыт. Онно, дьэ, бу тойон баһаар буолбут сирин көрбөккө эрэ, туох да силиэстийэни ыыппакка, Еремеев тыраахтарыттан баһаар барбыт диэн быһааран кэбиспит. Кэлин силиэстийэ ити быһаарыыга олоҕурбут.
Дьиҥэ, Еремеев тыраахтара бүтүн, сыл аайы техкөрүүнү ааһар эбит. Ол туһунан Технадзор тэрилтэ исписэлииһэ М.И. Винокуров суукка көрдөрүү биэрбит. Аркадий Иннокентьевич сааһын тухары, 42 сыл устата механизаторынан үлэлээбит киһи, ама, оҥостубат үһү дуо?
Г.Д. Белоногов уоту бастаан көрбүт сиргитин хаартыскаҕа түһэриҥ диэн, тиийэн хаартыскалаабыттар. Балаҕан ыйын
22 күнүгэр 2022 сылга силиэдэбэтэл Л.В. Романова «Хаартыскаҕа бааргын, онон хайаан да илии баттыахтааххын» диэн илии баттаппыт. Саха киһитэ кэнэн майгылаах, эппиттэрин аанньа илии баттаатаҕа. Суукка онто барыта бэйэтин утары буолан тахсыбыт.
Доппуруостар
Бастакы силиэстийэлиир доппуруос от ыйын 30 күнүгэр 2022 с. Орто Халыма куоракка буолбут. Доппуруоһу дознаватель С.В. Оконешников саҕалаабыт. Ол кэннэ боротокуолу полиция сотруднига, опер Азамат диэн силиэдэбэтэл оҥорбут. Тылбаасчыт көрдөөбүтүн, адвокатыҥ тылбаастыа диэн аккаастаабыттар. Силиэдэбэтэл буруйгун билин диэн дирбийэртэн атыны билбэтэх.
От ыйын 30 күнүгэр тыраахтар выхлопной турбатын устан эспэртиизэҕэ ыытарга быһаарбыттар. От ыйын 31 тахсар түүнүгэр выхлопной турбаны уста дознаватель С.В. Оконешниковы кытта бара сатаабыттар даҕаны, тиийбэккэ, төннүбүттэр. Онон С.В. Оконешников выхлопной турбаны от ыйын 27 күнүгэр устубуппут диэн көрдөрүүтэ сымыйа буолан тахсар. С.В. Оконешников от ыйын 27-28 күннэригэр «Осмотр места происшествия» диэн сымыйа боротокуолу оҥорбутугар олоҕуран Еремеевкэ холуобунай дьыала тэриллибит. Дьэ, бу үлэҕэ дьалаҕай уонна эппиэтинэһэ суох сыһыантан киһи олоҕо огдолуйдаҕа.
Адвокат А.З. Егоров: «Осмотр места происшествия» боротокуола тоҕо илиинэн суруллубакка, бэчээттэммитий» диэн ыйытыытыгар, Оконешников ойуурга ноутбуктаах, принтердээх сылдьыбытым» диэн эппиэттээбит. Оннооҕор куорат сиргэ, биһиэхэ, суруналыыстарга, итинник оборудованиены таһа сылдьарбыт кыаллыбат. Аны суукка принтерэ аккумулятордаах этэ диэн сымыйа көрдөрүүнү биэрбитин итэҕэйбиттэр.
Бу боротокуолга уот барбыт сириттэн күлү бакыакка укпуттарын, тыраахтар выхлопной турбатын устан, полиэтиленовай бакыакка укпуттарын хаартыскаҕа түһэрэн, эспэртиизэҕэ ыытарга бэлэмнээбиппит диэн суруллар. Ол эрээри сибидиэтэл Н.В. Лаптев уонна «Колымское лесничество» ГКУ исписэлииһэ Е.Н. Горохов уонна А.И. Еремеев от ыйын 27, 28 күннэригэр ханнык да боротокуолга илии баттаабатахтар. Оттон туоһу буолааччылар, баһаарынай чаас үлэһиттэрэ Г.Д. Белоногов, И.Н. Слеп-
цов, ОНД ПР дознавателэ С.В. Оконешниковы өйөөн, боротокуолу оҥорбуппут диэбиттэр.
Сымыйа кырдьык үрдүгэр ыттыбат
Ити этиллибит дьон бу күн, от ыйын 27 күнүгэр уоту умуруора атын сиргэ сылдьыбыттарын сибидиэтэллэр П.М. Ко-
лесов, М.М. Бандеров туоһулаан, суукка көрдөрүү биэрэллэр.
Дьокуускай эспэртиисэтэ ыытыллыбыт бакыаттан тугу да булбат, выхлопной турбаны бүтүн, турбаттан 100% уот барбыт диэбэт. Силиэстийэ саҕана силиэдэбэтэл Л.В. Романова тыраахтар учаастакка хаалбытынан, оннук мааркалаах бөһүөлэккэ баар тыраахтары хаартыскаҕа түһэрэн холуобунай дьыалаҕа тиспит. Дьыаланы силиэдэбэтэл
А.Т. Доскалиев түмүктээн борокуратуураҕа биэрэр.
Дознаватель С.В. Оконешников оҥорбут «О назначении пожарно-технической экспертизы» боротокуолугар даатата штриҕинэн сотуллан, үрдүнэн атырдьах ыйын
1 күнэ диэн суруллубут. Ол күн Еремеев Орто Халыма куоратыгар суох эбит, Сайбалаах учаастакка баһаары умуруора сылдьыбытын А.И. Еремеев, С.А. Батюшкин, А.С. Винокуров, А.К. Третьяков суукка бигэргэппиттэрин суут ылымматах.
Суут
Муус устар 10 күнүгэр 2023 с. борокуруор А.А. Холмогоров баһаарынай чаас үлэһитин И.Н. Слепцову суукка аҕалан хат доппуруостуур уонна суут силиэстийэтин сөргүттэрэр. И.Н. Слепцов суукка бастаан биэрбит көрдөрүүтүн букатын атыннык уларытар. Бастакы көрдөрүүтүгэр Н.В. Лаптевы, Е.Н. Гороховы уонна А.И. Еремеевы “Осмотр места происшествия” суох этилэр, оттон иккис көрдөрүүтүгэр бу дьону бары баар этилэр, икки күн боротокуолу оҥорбуппут диэбит. Бу боротокуол сокуоннайа суох диэн адвокат А.З. Егоров ходатайство түһэрбитин, суут аккаастыыр.
Борокуруор А.А. Холмогоров буруйдааһына барыта дознаватель С.В. Оконешников, сибидиэтэл И.Н. Слепцов сымыйа көрдөрүүлэринэн уонна метеостанция от ыйын 27 күнүн 2022 с. көрдөрүүтүн ыспыраапкатыгар олоҕуран оҥоһуллубут, онно тыал күүһэ сөкүүндэҕэ 12 м диэн. Ол күн баһаары умуруора икки учаастактан от кэбиһэ сылдьар дьон кэлбиттэр. Итиччэ күүстээх тыалга оту кээспэттэрэ чахчы, оччотугар хайдаҕый. Адвокат А.З. Егоров ити күннээҕи Налимскай метеосводкатын ылбыт, онно тыал күүһэ сөкүүндэҕэ 3 м диэн. Ол ыспыраапка эмиэ суукка аахсыллыбатах.
А.И. Еремеев оҥорботох дьыалатыгар, баhаартан тахсыбыт 51 мөл. солк. суумалаах хоромньуну төлүүрэ оруннаах дуо? Үрдүкү Суукка ааһыныа дуо? Сайбалаах учаастакка баһаары утары ыыппыт уоттара, туспа баһаар буолан, атын сиргэ барбытын уонна бу учаастакка түөрт сыл анараа өттүгэр баһаар туран, тыа умайбытын учуоттаабатахтар. Ол туһунан суукка кыттыбыт сибидиэтэллэр көрдөрүүлэрэ бигэргэтэр.
Ыйааһын бэскитэ бу харытын күүһүнэн үлэлээн-хамсаан олорор, отчут-масчыт саха боростуой киһитигэр тоҕо ыараата. Суут таҥарата кини туһатыгар буолбакка, тоҕо хараҕын саба баанна?
