Быйыл сахалартан бастакынан Сэбиэскэй Сойуус Геройа ааты сүкпүт Аҕа дойду Улуу сэриитин кыттыылааҕа Фёдор Кузьмич Попов 100 сааһын бэлиэтиир. Өйдөбүнньүк тэрээһиннэр ахсынньыга ыытыллыахтара.
Бэлиэ күнү көрсө Федор Кузьмич төрөөбүт Мэҥэ Хаҥалаһыгар бу сыл «Герой сылынан» биллэриллибитэ. Ити чэрчитинэн «Майа-Төҥүлү-Бороҕон-Сыымах» хайысханан 24 км айан суола тутуллар, гаастааһын итиэннэ оптоволоконнай ситимҥэ холбонуу үлэлэрэ бараллар.
Тыа хаһаайыстыбатын министиэристибэтин нөҥүө Баатара нэһилиэгин Тиэрэ үрэҕэр быһыт оҥоһуллуо.
Дьокуускайга Фёдор Попов аатынан уулуссаҕа сквер оҥоһуллуо, Герой пааматынньыга туруо. Мэҥэ Хаҥаласка Федор Кузьмич олорбут «Сайыҥҥы уһаайбатын» уларыта тутуохтара.
This post was published on 14.07.2021 15:57 15:57