29 Кулун тутар 29.03
  • -12°
  • $ 92,26
  • 99,71

Федеральнайдааҕы бырагыраама. Бэрдьигэстээҕи гаастааһын Горнай улууһун кэскилин быһаарар

Читайте нас на
Яндекс Новости
ЯДВ

СӨ Ил Дархана А.С.Николаев Чурапчыга Физкультура уонна спорт үнүстүтүүтүн 20 сыллаах үбүлүөйүнэн оробуочай сырыытын кэмигэр, «Куочалы» ТОС-ка гаас киирэр кэмигэр, Федерация Сэбиэтин кэмитиэтин бэрэссэдээтэлин солбуйааччы Е.А.Борисов, биһиэхэ сыһыаннаах олус үчүгэй сонуну иһитиннэрбититтэн, Горнай улууһун дьоно-сэргэтэ үөрэн-көтөн олоробут. Кини онно СӨ Ил Дархана А.С.Николаев Арассыыйа салалтатыгар, министиэристибэлэргэ итэҕэтиилээх туруорсуутун түмүгэр, Саха сирин сайдыытыгар өр кэмҥэ быһаарыллыбатах боппуруостар оннуларыттан хамнаабыттарын, кэскиллээх дьаһаллар ылыллыбыттарын ураты бэлиэтээн эппитэ.


СӨ Ил Дархана А.С.Николаев Арассыыйа салалтатыгар, министиэристибэлэргэ итэҕэтиилээх туруорсуутун дьаһалларыттан биирдэстэрэ – 2020 с. Чурапчы уонна Бэрдьигэстээх сэлиэнньэлэрин гаастааһыны саҕалааһын Федеральнайдааҕы бырагыраамаҕа киириитэ — Горнай улууһун сайдыытын сүрүн укулаатынан буолар кыахтанна.

Горнай улууһун дьоно маннык санааларын үллэстэллэр.

Саҥа дьыллааҕы улахан бэлэх

Д.Д.Санников, СӨ култууратын үтүөлээх үлэһитэ, Сэмэн Данилов аатынан Бэрдьигэстээх орто оскуолатын учуутала

— Эһиилгиттэн Бэрдьигэстээххэ гаас киириитэ, Горнай улууһун дьонун-сэргэтин элбэх сыллаах ыра санаалара туолуута дии саныыбын. Туруорсуу хас эмэ уонунан сылларга бардаҕа дии. Кэлин бырабыыталыстыба отчуотун аайы, сүрүн туруорсуу ити буолара. Онон олохтоох нэһилиэнньэ, Саҥа дьылы маннык үчүгэй сонуннаах, бэлэхтээх үөрэ-көтө көрсөр дии саныыбын. Сотору кэминэн хочуолунайга гаас киирэн, ый аайы төлүүрбүт да, биллэ-көстө чэпчииригэр эрэл улахан.

Гаастаах нэһилиэктэр сайдыылаахтар

Ю.А.Алексеев, Горнайдааҕы гааһы эксплуатациялааһын  учаастагын начаалынньыга:

— Гаастаах нэһилиэктэргэ үлэ-хамнас, сайдыы биллэ-көстө иннин диэки баран иһэр эбит диэн үгүстэр бэлиэтииллэр. Горнайга үс нэһилиэк толору гаастанан турар. Быйылгы сылынан көрөр эбит буоллахха, гааска холбонуу маннык: Аһымаҕа 132, Бэс Күөлүгэр 176, Күөрэлээххэ 132  абонент, ол иһигэр сүрүннээн ыаллар уонна нэһилиэк тэрилтэлэрэ киирэллэр. Биһиги  кинилэргэ барыларыгар, гаас ханнык да хааччаҕа, саахала суох бэриллиитин ситиһэбит. Билигин даҕаны бу нэһилиэктэргэ былаан быһыытынан, гааһы киллэрии үлэтин кэҥэтэн ыыта, эбии абоненнары  холбуу сылдьабыт.

Гаас – түөрт төгүл кэмчилиир

Г.М.Егоров, улуустааҕы киин балыыһа кылаабынай бырааһа:

— Биһиги нэһилиэктэрдээҕи балыыһаларбытын сылытыыны барытын туспа гаас хочуолларыгар холбообуппут. Бэс Күөлүн 2017 с., Күөрэлээҕи уонна Аһыма балыыһаларын 2018 с. ОДьКХ-тан арааран, гаастары кытта бэйэбит быһа аахсабыт. Ол биһиэхэ бары өттүнэн туһалаах, лаппа барыстаах диэн түмүккэ кэлэн олоробут. Ол курдук, үс балыыһабытын оттууну туспа гааска киллэрии түмүгэр, үбүн кэмчилээһинэ түөрт төгүл курдук буолла.

Бу ааспыт бээтинсэҕэ Бэрдьигэстээххэ бастакынан биһиги обьектарбытын сылытар хочуолунай гааска холбонно. Дьиэбит-уоппут лаппа сылыйда, онон үлэлииргэ усулуобуйа тупсар. Улуустааҕы коммунальнай хаһаайыстыба улахан да тымныыларга ирдэниллэр сылытыыны толору хааччыйар кыахтаах диэн бигэ түмүккэ кэлэн олоробут. Бэрдьигэстээҕи гаастааһыҥҥа Ил Дархан А.С.Николаев ыытар кэскиллээх, ырааҕы көрөр үлэтин түмүгэр, бастакы ситиһиилэр баалларыттан үөрэбит, махтанабыт.

Ааптар: Василий Алексеев, Бэрдьигэстээх

Следите за самым важным и интересным в Telegram-канале и WhatsApp-группе ЯСИА